Blog Full

2024-cü il üzrə hesabat dövrünü 100.000 manat mənfəətlə başa vuran dərman ləvazimatlarının satışı ilə məşğul olan müəssisə tərəfindən talessemiya xəstələrinin müalicəsi məqsədilə “Milli Talessemiya Mərkəzi”nə 20.000 manat nağdsız qaydada ianə edilib. Qeyd olunan sosial ödənişlə bağlı müəssisəyə hər hansı vergi güzəşti tətbiq edilirmi?

İqtisadiyyat Nazirliyi yanında Dövlət Vergi Xidmətindən bildirilib ki, Vergi Məcəlləsinin 106.1.18-ci maddəsinin müddəalarına əsasən, vergi ödəyicisinin hesabat ilinin mənfəətinin 15 faizindən çox olmayan hissəsinin müvafiq icra hakimiyyəti orqanının müəyyən etdiyi orqan tərəfindən müəyyən edilmiş meyarlara cavab verən səhiyyə sahəsində fəaliyyət göstərən müəssisə, idarə və təşkilatlara köçürülən hissəsi 2024-cü il 1 yanvar tarixdən 5 il müddətinə mənfəət vergisindən azad edilib. Bu maddənin müddəaları yalnız nağdsız qaydada ödənilən xərclərə münasibətdə tətbiq olunur. Belə ki, 2024-cü il yanvarın 1-dən Vergi Məcəlləsinin 106.1.18-ci maddəsində edilmiş dəyişikliyə əsasən, güzəşt məbləği mənfəətin 10 faizindən 15 faizinə qədər qaldırılıb.

Eyni zamanda, Nazirlər Kabinetinin 2020-ci il 12 mart tarixli 88 nömrəli Qərarı ilə təsdiq edilmiş “Azərbaycan Respublikası Vergi Məcəlləsinin 106.1.18-ci maddəsinə uyğun olaraq, vergidən azadolunma məqsədləri üçün elm, təhsil, səhiyyə, idman və mədəniyyət sahələrində fəaliyyət göstərən müəssisə, idarə və təşkilatların Meyarları”nın 4-cü bəndində səhiyyə sahəsində fəaliyyət göstərən müəssisə, idarə və təşkilatların meyarları müəyyən edilib. Buna əsasən, müəssisə tərəfindən sözügedən meyarlara cavab verən tibb müəssisəsinə 2024-cü il üzrə hesabat ilinin mənfəətinin 15 faizindən çox olmayan hissəsinin ianə məqsədilə (100.000 x 15% = 15.000) köçürülməsi mənfəət vergisindən azaddır.

Əsas: Vergi Məcəlləsinin 106.1.18-ci maddəsi

Mənbə: vergiler.az

Ölkənin maliyyə qurumları arasında ən böyük işəgötürən şirkətlərdən biri olan Kapital Bank 2024-cü ildə də “Great Place to Work” sertifikatına layiq görülərək işçi məmnuniyyəti və iş şəraiti üzrə yüksək standartları qoruyub saxladığını bir daha təsdiq etdi.

Qeyd edək ki, “Great Place to Work” (“Mükəmməl iş yeri”) beynəlxalq tədqiqat və konsaltinq şirkəti olaraq 5 qitədə, 60-dan çox ölkədə fəaliyyət göstərir və şirkətlərin işçiləri tərəfindən necə qiymətləndirildiyini, sektordakı yerini, eləcə də kommunikasiya strategiyalarını ölçərək ən yüksək nəticə əldə edən şirkətlərə eyniadlı sertifikatı təqdim edir.

Şirkət tərəfindən aparılan qiymətləndirmələrdə Kapital Bank əməkdaşlar tərəfindən “Karyera yüksəlişi imkanları”, “Pozitiv iş mühiti və şirkət mədəniyyəti”, “İş və həyat balansı” kimi bir çox kateqoriyada yüksək dəyərləndirilib.

Kapital Bank-ın İstedadların idarə edilməsi departamentinin direktoru Aygün Musayeva bu mükafata layiq görülməyin qürurverici olduğunu vurğulayaraq bildirib: “Bizim İstedadların idarə edilməsi üzrə strategiyamız əməkdaşları peşəkar olaraq yetişdirməyə, liderlik bacarıqlarını artırmağa, onları motivasiyada saxlamağa, eyni zamanda şəxsi bacarıqlarının inkişafı üçün rahat mühit yaratmağa fokuslanıb. Çünki doğru yolun belə olduğundan əminik, istiqaməti dəqiq bilirik. Çox sevinirəm ki, səsləndirdiyimiz fikirlər rəsmi olaraq da öz təsdiqini tapıb. Uğur qazanmaq qədər onu qoruyub saxlamaq da önəmlidir. Mükəmməl iş yeri adını 2-ci dəfə qazanmaq çox qürurvericidir. Bütün uğurlarımız kimi bu uğurumuzun da səbəbkarı olan komandamıza təşəkkür edirəm. Doğru yolda böyük addımlarla irəliləyəcəyimizə inanıram.”

Bu sertifikat Kapital Bank-ın işçi məmnuniyyəti, inkişaf imkanları və iş mühiti üzrə yüksək standartlarını təsdiqləyir və işəgötürən brendi olaraq böyük bir üstünlük yaradır.

Ölkənin birinci bankı olan Kapital Bank PAŞA Holding-ə daxildir və Azərbaycanda ən böyük filial şəbəkəsi, 120 filialı və 53 şöbəsi ilə müştərilərin xidmətindədir. Bankın məhsul və xidmətləri barədə daha ətraflı məlumat almaq üçün https://kapitalbank.az saytına, 196 Sorğu Mərkəzinə və ya Bankın müxtəlif sosial şəbəkələrdə olan səhifələrinə müraciət edə bilərsiniz. Nağd pul krediti sifarişi üçün— https://kbl.az/prgtk, Birbank kartı sifarişi üçün — https://kbl.az/prcrc.

Vergi Məcəlləsinin 88.1-ci maddəsinə əsasən, məhkəmənin qanuni qüvvəyə minmiş qərarı ilə təmin edilmiş borc məbləğləri istisna olmaqla, vergilər üzrə yaranmış borc bu Məcəllənin 85.4-cü maddəsinin müddəaları nəzərə alınmaqla aşağıdakı sıra qaydası ilə ödənilir:

• yaranma tarixi ardıcıllığı ilə hesablanmış verginin məbləği;
• hesablanmış faizlərin məbləği;
• tətbiq edilmiş maliyyə sanksiyalarının məbləği.

Mövzunu iqtisadçı Anar Bayramov şərh edir:

Vergi Məcəlləsinin 88-ci maddəsində edilmiş dəyişikliklərdə məhkəmənin qanuni qüvvəyə minmiş qərarı ilə təmin olunmuş borc məbləğlərinin istisna edilməsi qeyd olunur. Həmçinin, Vergi Məcəlləsinə əlavə edilmiş 88.2-1-ci maddəyə əsasən, məhkəmənin qanuni qüvvəyə minmiş qərarı ilə təmin edilmiş borc məbləğləri bu Məcəllənin 88.1-ci və 88.2-ci maddələrində göstərilən sıra qaydasından asılı olmayaraq, hər bir qətnamə üzrə ayrılıqda ödənilir.

Bildiyimiz kimi, vergi ödəyicisinin şəxsi hesab vərəqəsində məhkəmə ilə bağlı borc olarsa, o zaman yeni bölmə yaradılır. Bu səbəbdən də Vergi Məcəlləsinin 88-ci maddəsinə uyğun olaraq, vergilər üzrə borcların ödənilməsi qaydasında redaktə tipli düzəlişin həyata keçirilməsinə ehtiyac yaranıb.

Misal

Məhkəmə qərarına əsasən, vergi ödəyicisinin 10.000 manat borcu yaranıb. Ödəyicinin təqdim etdiyi bəyannamə üzrə 2.000 manat məbləğində vergi borcu da mövcuddur. Məhkəmə qərarı əsasında vergi ödəyicisinə əmlakının satışından 3.000 manat ödəniş daxil olub. Bu zaman həmin ödəniş məhkəmə borcunun ödənilməsinə yönəldiləcək. Bundan əlavə, vergi ödəyicisi könüllü surətdə məhkəmə üzrə borcunu təsnifata uyğun ödədiyi halda, həmin məbləğ şəxsi hesab vərəqəsinə yönəldiləcək.

Vergi Məcəlləsində qeyd olunan dəyişikliyin əsas səbəblərindən biri vergi orqanı ilə məhkəmələr arasında yaranan problemin həllinə dəstək olmaqdır. Təcrübədə vergi orqanı tərəfindən vergi ödəyicilərinin siyahıya alınmış əmlakının ixtisaslaşdırılmış açıq hərracda satılması və borclu vergi ödəyicilərinin ölkədən getmək hüququnun müvəqqəti məhdudlaşdırılmasına dair məhkəmə prosesi həyata keçirilir. Vergi ödəyicisi borc məbləği üzrə ödəniş qəbzlərini məhkəməyə təqdim etdikdə, məhkəmə borcun ödənildiyini əsas gətirərək, iş üzrə icraata xitam verirdi.

Amma vergi ödəyicisinin şəxsi vərəqəsində borcun ödənilməsi ardıcılığı pozulduğu üçün məhkəmə prosesi üzrə borc məbləği tam bağlanmırdı. Bu cür hallar isə inzibati orqanla həm vergi ödəyicisi, həm də məhkəmə arasında narazılığın yaranmasına səbəb olurdu. Vergi Məcəlləsinin 88-ci maddəsində edilmiş dəyişiklik nəticəsində həmin proses də tənzimlənəcək.

Mənbə: vergiler.az

Mən yay aylarında mövsümi turizm fəaliyyəti ilə məşğul oluram. Əgər 5 nəfər işçi ilə əmək müqaviləsi bağlayıb fəaliyyətə başlayaramsa nə qədər vergi ödəməliyəm?

İqtisadiyyat Nazirliyi yanında Dövlət Vergi Xidmətindən bildirilib ki, qeyd olunan fəaliyyət sahibkarlıq fəaliyyəti hesab edilir. Vergi Məcəlləsinin 33.4-cü maddəsinə əsasən, hüquqi şəxs yaratmadan sahibkarlıq fəaliyyətini həyata keçirən fiziki şəxs sahibkarlıq fəaliyyətinə başladığı günədək vergi uçotuna alınma ilə bağlı ərizəni vergi orqanına təqdim etməklə vergi uçotuna alınmalı (VÖEN əldə etməli) və əldə etdiyi gəlirdən vergini dövlət büdcəsinə ödəməlidir.

“Fiziki şəxsin uçotu haqqında Ərizə”ni vergi orqanına təqdim etməklə vergi uçotuna alına bilərsiniz. Ödənişsiz aparılan uçotaalınma ASAN xidmət mərkəzlərində, ASAN xidmət mərkəzlərinin olmadığı şəhər və rayonlarda isə vergi ödəyicilərinə xidmət mərkəzlərində həyata keçirilir.

Vergi öhdəlikləri isə vergi uçotuna alınarkən təqdim olunan ərizədə seçilmiş vergitutma sisteminə və yaranan vergitutma obyektlərinə uyğun olaraq müvafiq vergilərdən (sadələşdirilmiş vergi və ya gəlir vergisi, ƏDV) ibarət olacaq. Belə ki, həmin fiziki şəxs tərəfindən sadələşdirilmiş vergitutma sistemi seçildiyi halda, ticarət fəaliyyətindən əldə edilən gəlirlərdən (ümumi hasilatdan) xərclər çıxılmadan 2 faiz dərəcə ilə sadələşdirilmiş vergi hesablanıb dövlət büdcəsinə ödənilir. Qeyd olunan fəaliyyət gəlir vergisinin ödəyicisi kimi həyata keçirildiyi halda, əldə edilmiş gəlirdən həmin gəlirin əldə edilməsi ilə bağlı çəkilən xərclər çıxıldıqdan sonra qalan məbləğdən 20 faiz dərəcə ilə gəlir vergisi hesablanıb dövlət büdcəsinə ödənilir. Mikro sahibkarlıq subyektləri isə (işçilərinin orta siyahı sayı 1-10 nəfər aralığında olan və illik gəliri 200.000 manatdan yuxarı olmayan şəxslər) gəlirlər və xərclərin uçotunu aparmaqla 75 faiz vergi güzəştindən yararlana bilər.

Vergi orqanlarında uçot prosedurları, fəaliyyətinizin xüsusiyyətlərindən asılı olaraq etməli olduğunuz hərəkətlər barədə daha ətraflı məlumat almaq üçün Dövlət Vergi Xidmətin rəsmi səhifəsindəki “Vergi bələdçisi” bölməsində yerləşdirilən məlumatlarla tanış ola, əlavə suallar yarandıqda isə Çağrı Mərkəzinə (195-1) və ya vergi ödəyicilərinə xidmət mərkəzlərinə müraciət edə bilərsiniz.

Əsas: Vergi Məcəlləsinin 16-cı, 97-ci, 101-ci, 102-ci və 220-ci maddələri

Mənbə: vergiler.az