Blog Full

Ekologiya və Təbii Sərvətlər Nazirliyinin “Azərbaycan Yaşıllaşdırma və Landşaft Quruluşu” ASC (“Azəryaşlandşaft” ASC) 2023-cü il maliyyə hesabatlarının beynəlxalq standartlara uyğun auditi üçün kotirovka sorğusu elan edib.

Sorğuda iştirak haqqı 19 manatdır.

İddiaçılar təkliflərini iyunun 13-nə qədər səhmdar cəmiyyətinin yerləşdiyi Bakı şəhəri, Xətai rayonu, 8 noyabr prospekti, 61 ünvanına təqdim edə bilərlər.

Təkliflərə iyunun 13-də, saat 11:00-da qeyd olunan ünvanda baxılacaq.

Mənbə: report.az

Satmaq üçün xaricdən mal gətirdikdən sonra hansı əməliyyatları həyata keçirməliyəm?

İqtisadiyyat Nazirliyi yanında Dövlət Vergi Xidmətindən bildirilib ki, sorğuda qeyd olunan fəaliyyət sahibkarlıq fəaliyyəti hesab edilir. Vergi Məcəlləsinin 33.4-cü maddəsinə əsasən, hüquqi şəxs yaratmadan sahibkarlıq fəaliyyətini həyata keçirən fiziki şəxs sahibkarlıq fəaliyyətinə başladığı günədək vergi uçotuna alınma ilə bağlı ərizəni vergi orqanına təqdim etməklə vergi uçotuna alınmalı (VÖEN əldə etməli) və əldə etdiyi gəlirdən vergini dövlət büdcəsinə ödəməlidir.

“Fiziki şəxsin uçotu haqqında Ərizə”ni vergi orqanına təqdim etməklə vergi uçotuna alına bilərsiniz. Ödənişsiz həyata keçirilən uçotaalınma ASAN xidmət mərkəzlərində, ASAN xidmət mərkəzlərinin olmadığı şəhər və rayonlarda isə vergi ödəyicilərinə xidmət mərkəzlərində həyata keçirilir.

Vergi öhdəlikləri vergi uçotuna alınarkən təqdim olunan ərizədə seçilmiş vergitutma sisteminə və yaranmış vergitutma obyektlərinə uyğun olaraq müvafiq vergilərdən (sadələşdirilmiş vergi və ya gəlir vergisi, ƏDV) ibarət olacaqdır. Belə ki, həmin fiziki şəxs tərəfindən sadələşdirilmiş vergitutma sistemi seçildiyi halda, ticarət fəaliyyətindən əldə edilən gəlirlərdən (ümumi hasilatdan) xərclər çıxılmadan 2 faiz dərəcə ilə sadələşdirilmiş vergi hesablanıb dövlət büdcəsinə ödənilir. Qeyd olunan fəaliyyət gəlir vergisinin ödəyicisi kimi həyata keçirildiyi halda isə əldə edilmiş gəlirdən həmin gəlirin əldə olunması ilə bağlı çəkilən xərclər çıxıldıqdan sonra qalan məbləğdən 20 faiz dərəcə ilə gəlir vergisi hesablanıb dövlət büdcəsinə ödənilir. Mikro sahibkarlıq subyekti (işçilərinin orta siyahı sayı 1-10 nəfər aralığında olan və illik gəliri 200.000 manatdan yuxarı olmayan şəxslər) gəlirlərin və xərclərin uçotunu aparmaqla, 75 faiz vergi güzəşti əldə edə bilər.

Vergi orqanlarında uçot prosedurları, fəaliyyətinizin xüsusiyyətlərindən asılı olaraq etməli olduğunuz hərəkətlər barədə daha ətraflı məlumat almaq üçün “Vergi bələdçisi” bölməsində yerləşdirilən məlumatlarla tanış ola, əlavə suallar yarandıqda isə Çağrı Mərkəzinə (195-1) və ya vergi ödəyicilərinə xidmət mərkəzlərinə müraciət edə bilərsiniz.

Əlavə olaraq bildiririk ki, qanunla müəyyən edilmiş hallarda və qaydada idxal-ixrac əməliyyatlarına nəzarəti gömrük orqanları həyata keçirir. Bu səbəbdən, idxal zamanı vergitutma prosedurları, habelə gömrük rüsumları barədə daha ətraflı məlumatın alınması üçün aidiyyəti üzrə Dövlət Gömrük Komitəsinin 195-6 Çağrı Mərkəzinə müraciət etməyinizi tövsiyə edirik.

Əsas: Vergi Məcəlləsinin 16-cı, 97-ci, 101-ci, 102-ci və 220-ci maddələri

Mənbə: vergiler.az

Əmək qanunvericiliyinin tələbinə əsasən, əmək münasibətləri əmək müqavilələri bildirişləri elektron informasiya sistemində gücləndirilmiş elektron imza vasitəsilə qeydiyyata alınmasından və bu barədə işəgötürənə elektron qaydada məlumat göndərilməsindən sonra yaranır. Bəs bu qaydalara əməl edilməməsi hansı məsuliyyət yaradır? Bu suala insan resursları üzrə ekspert Ramin Hacıyev aydınlıq gətirir:

Ölkədə kadr resurslarının vahid elektron bazada toplanması, qeyri-formal məşğulluğun qarşısının alınması və əmək münasibətlərinə nəzarət etmək məqsədilə 10 may 2022-ci il tarixdə Əmək və Məşğulluq Altsistemi (ƏMAS) istifadəyə verilib. Əmək müqaviləsi bildirişi elektron informasiya sistemində qeydiyyata alındıqdan və bu barədə işəgötürənə elektron qaydada məlumat göndərildikdən sonra hüquqi qüvvəyə minir. Əmək Məcəlləsinin 7-ci maddəsinin 2-1-ci bəndinə əsasən, siyahısı Azərbaycan Respublikasının Prezindenti tərəfindən təsdiq edilmiş dövlət orqanlarında müvafiq vəzifələrə (peşələrə) qəbul edilən işçilərlə işəgötürənlər arasında əmək münasibətləri əmək müqaviləsi kağız üzərində yazılı formada bağlandıqda yaranır.

Əmək müqavilələrinin bağlanması, dəyişdirilməsi və xitam verilməsi, o cümlədən yeni yaradılmış və boş ştatların məşğulluq altsisteminə göndərilməsi ƏMAS vasitəsilə həyata keçirilir. Bununla əlaqədar həmin əməliyyatların vaxtında və qanunverciliyin tələbinə uyğun həyata keçirilməməsi gələcəkdə məsuliyyət yaradır.

Misal 1

ƏMAS-da işçi işə qəbul edilərkən işə başlama tarixi 20 may 2023-cü il qeyd olunmasına baxmayaraq, müqavilə 21 mart 2023-cü il tarixdə qeydiyyata alınıb. Bu, qanun pozuntusu hesab olunur.

Misal 2

Texniki və digər səbəblərdən müqavilə qeydiyyata alınmır və həmin bildiriş icrada olan bildirişlər reyestrində yerləşir. İnsan resusrları mütəxəssisi növbəti gün bildirişi imzalayarsa, bu da qanun pozuntusu hesab edilir. İcrada olan əmək müqaviləsi bildirişi ləğv edilib yenidən qeydiyyata alınarsa (işə başlama tarixi qeydiyyata alındığı tarixi yazmaq şərtilə), bu problemi texniki olaraq aradan qaldırmaq mümkündür.

Misal 3

ƏMAS-da yeni ştat (iş yeri) yaradılır və məşğulluq altsisteminə ştat məlumatları göndərilmədən işçinin əmək müqaviləsi qeydiyyata alınır. Bu da qanunvericiliyin tələblərinə zidd haldır.

Misal 4

Müəssisədə boş ştat yaranır, bir müddət sonra məşğulluq altsisteminə məlumat göndərilmədən həmin ştata işçi işə qəbul olunarsa, bu hal da qanunvericiliyin tələblərinə ziddir.

Qeyd edək ki, əmək müqaviləsi bildirişi qeydiyyata alınarkən işçinin işə başlama tarixi ilə bildirişin imzalandığı tarixi ya eyni tarix olmalı, ya da bildirişin imzalanma tarixi əvvəlki tarix olmalıdır. Əgər bildiriş işçi işə başladıqdan sonrakı tarixdə imzalanarsa, İnzibati Xətalar Məcəlləsinin 192.1-ci maddəsinə əsasən, fiziki şəxslər 1.000 manatdan 2.000 manatadək, vəzifəli şəxslər 3 min manatdan 5 min manatadək, hüquqi şəxslər 20 min manatdan 25 min manatadək məbləğdə cərimə edilir. Bu formada qeydiyyata salınan 10 və daha çox işçi sayı olarsa, həmin fiziki şəxs və ya müəssisə üçün cinayət məsuliyyəti yaranır.

Vakansiyaların ƏMAS-da göstərilməməsi də cərimələrə səbəb ola bilər. Tutaq ki, müəssisədə 20.05.2024-cü il tarixdə yeni ştat (iş yeri) yaradılır. Məşğulluq altsisteminə vakansiya barədə məlumat göndərilmədən işə işçi qəbul olunarsa, yaxud boş ştat yarandığı tarixdən 5 iş günü müddətində boş ştat barədə məlumat məşğulluq altsisteminə göndərilməzsə, İnzibati Xətalar Məcəlləsinin 540.2-ci maddəsinə əsasən, vəzifəli şəxslər 500 manatdan 1.000 manatadək cərimə edilir. Əgər müəssisədə boş ştat varsa, 5 iş günü müddəti bitmədən həmin ştatların ƏMAS-da ləğv olunması daha məqsədəuyğundur.

Mənbə: vergiler.az

Tenderlər üçün iştirak haqqı ödəyən hüquqi və ya fiziki şəxs həmin məbləği xərc kimi gəlirlərindən çıxa bilərmi? Mənfəət və ya gəlir vergisinin hesablanması zamanı bu nəzərə alınırmı?

İqtisadiyyat Nazirliyi yanında Dövlət Vergi Xidmətindən bildirilib ki, “Dövlət satınalmaları haqqında” Qanunun 2-ci maddəsinin müddəalarına əsasən, iştirak haqqı tenderin əsas şərtlər toplusunu və ya kotirovka sorğusunun şərtlərini almaq və iddiaçı kimi qeydiyyatdan keçmək üçün malgöndərən (podratçı) tərəfindən ödənilən vəsaitdir.

Adıçəkilən Qanunun 29-cu maddəsinin müddəalarına əsasən, bu Qanunun 50-1.1-ci maddəsində nəzərdə tutulmuş hallar istisna olmaqla, keçirilən satınalmalar zamanı malgöndərən (podratçı) tenderin əsas şərtlər toplusunu və kotirovka sorğusunun şərtlərini almaq və iddiaçı kimi qeydiyyatdan keçmək üçün satınalan təşkilata iştirak haqqı ödəyir. İştirak haqqının ümumi məbləğini tender predmetinin ehtimal olunan qiymətinin 0,3 faizindən və tender xərclərinin 1,2 mislindən çox olmamaq şərti ilə satınalan təşkilat müəyyən edir. Tenderin keçirilməsi ilə bağlı bütün xərclər, o cümlədən elan, reklam, tender keçirilən yerin icarəsi, tender komissiyasının maliyyələşdirilməsi, tender sənədlərinin hazırlanması və iddiaçılara çatdırılması xərcləri, həmçinin tenderin keçirilməsi ilə birbaşa əlaqədar olan bütün digər xərclər tenderdə iştirak haqları hesabına ödənilir. Tenderdə iştirak haqlarından toplanmış vəsait tender xərclərindən çox olduqda fərq satınalan təşkilatın sərəncamında qalır (büdcədən maliyyələşən təşkilatlarda dövlət büdcəsinə köçürülür), az olduqda isə fərq satınalan təşkilatın hesabından ödənilir.

Eyni zamanda, Vergi Məcəlləsinin 159.1-ci maddəsinə əsasən, malların təqdim edilməsi, işlərin görülməsi, xidmətlərin göstərilməsi, Azərbaycan Respublikası ərazisində istehsal olunan kənd təsərrüfatı məhsullarının pərakəndə satışı zamanı tətbiq edilən ticarət əlavəsi və vergi tutulan idxal ƏDV-nin vergitutma obyektidir. Bununla yanaşı Vergi Məcəlləsinin 71-1-ci maddəsinin müddəalarına əsasən, həmin Məcəllə ilə müəyyən edilmiş hallarda fərdi sahibkarlara və hüquqi şəxslərə malları təqdim edən, işləri görən və xidmətləri göstərən şəxs onlara elektron qaimə-faktura verir.

Vergi Məcəlləsinin 16.1.11-6-cı maddəsinə əsasən, vergi ödəyicisi kimi uçotda olan şəxslərə mal, iş və xidmətlərlə bağlı bu Məcəllədə nəzərdə tutulmuş qaydada elektron qaimə-faktura göndərmək vergi ödəyicisinin vəzifəsidir.

Qeyd olunanlara əsasən, tenderdə iştirak üçün ödənilən iştirak haqları xidmətlərin göstərilməsi ilə bağlı olduğundan ƏDV-yə cəlb olunur və elektron qaimə-faktura təqdim edilməlidir.

Əsas: Vergi Məcəlləsinin 16-cı, 71-1-ci, 159-cu maddələri, “Dövlət satınalmaları haqqında” Qanunun 2-ci və 29-cu maddələri

Mənbə: vergiler.az