Blog Full

Bu xidmət vergi öhdəliyinin əvvəlcədən müəyyənləşdirilməsi barədə qərarın qəbulunu əhatə edir.

Xidmətdən istifadə üçün vergi ödəyiciləri Vergi Məcəlləsinin 77-1-ci maddəsinin tələblərinə uyğun olaraq, ərizə, qərarın qəbulu tələb edilən vergi tutulan əməliyyata aid sənədlər, vergi tutulan əməliyyat üzrə vergi öhdəliklərinin və qanunvericiliyin tətbiqinin doğuracağı hüquqi nəticələrə dair qeydlər, qərarın qəbulu üçün zəruri hesab olunan digər məlumatlar və dövlət rüsumunun ödənilməsini təsdiqləyən sənədlə (ərizəyə və sənədlərə baxıldıqdan və vergi orqanı tərəfindən yazılı və ya şifahi məlumatlandırmadan sonra) birgə ərazi prinsipi nəzərə alınmaqla vergi ödəyicilərinə xidmət mərkəzlərinə və ya qeydiyyatda olduqları vergi orqanlarının xidmət strukturlarına müraciət edə bilərlər.

Xidmət tam elektronlaşdırılıb və vergi ödəyiciləri gücləndirilmiş elektron imzadan istifadə etməklə İnternet Vergi İdarəsi üzərindən (www.new.e-taxes.gov.az) Dövlət Vergi Xidmətinə elektron müraciət ünvanlaya bilərlər.

Xidmət nəticəsində vergi öhdəliyinin əvvəlcədən müəyyənləşdirilməsi barədə qərar və ya həmin qərarın qəbulundan imtina edilməsi ilə bağlı səbəblər vergi ödəyicisinə göndərilir. Qəbul edilmiş qərarlar barədə məlumatlar Dövlət Vergi Xidmətinin rəsmi internet saytında ayrıca bölmədə yerləşdirilir.

Ətraflı məlumat üçün:

https://www.taxes.gov.az/az/page/vs2023

https://new.e-taxes.gov.az/eportal/az/login

https://www.taxes.gov.az/az/page/elektron-xidmetler

https://www.taxes.gov.az/az/page/vergi-ohdeliyinin-evvelceden-mueyyen-edilmesi-barede-muracietler

Mənbə: vergiler.az

Bu xidmət fiziki şəxsin uçota alınmasını əhatə edir. Xidmət nəticəsində fiziki şəxs uçota alınaraq ona Şəhadətnamə verilir. Uçota alınmaq üçün fiziki şəxs və ya onun səlahiyyətli nümayəndəsi tərəfindən vergi orqanına “Fiziki şəxsin uçotu haqqında ərizə” təqdim olunur.

Uçota alınma “Fiziki şəxsin uçotu haqqında ərizə” və tələb edilən digər sənədlər vergi orqanına daxil olduğu gündən sonrakı 1 gün müddətində (fiziki şəxslərin elektron formatda uçota alınması istisna olmaqla) həyata keçirilir və fiziki şəxsin uçotu haqqında şəhadətnamə vergi ödəyicisinin elektron kabinetinə göndərilir. Vergi ödəyicisi tərəfindən şəhadətnamənin kağız daşıyıcısında da verilməsi ərizədə qeyd olunduqda şəhadətnamə fiziki şəxsə və ya onun səlahiyyətli nümayəndəsinə müvafiq jurnala imza atılmaqla təqdim edilir. Bu şəhadətnamə vergi orqanı tərəfindən fiziki şəxsə bir dəfə verilir və onda saxlanılır.

“Fiziki şəxsin uçotu haqqında ərizə”yə aşağıdakı sənədlər əlavə edilir:

• Vergi Məcəlləsinin 33.4-cü maddəsində nəzərdə tutulan fiziki şəxslər üzrə – uçota dayanmaq istəyən fiziki şəxsin şəxsiyyətini təsdiq edən sənədin surəti;
• ailə kəndli təsərrüfatlarının başçıları üzrə – uçota dayanmaq istəyən fiziki şəxsin şəxsiyyətini təsdiq edən sənədin və ailə kəndli təsərrüfatının bələdiyyə orqanlarında uçotuna götürülməsi barədə onun başçısına və ailə üzvlərinə verilən vəsiqənin surəti;
• torpaq mülkiyyətçiləri üzrə – uçota dayanmaq istəyən fiziki şəxsin şəxsiyyətini təsdiq edən sənədin, torpağa mülkiyyət hüququnu təsdiq edən sənədin və “Torpaq sahəsinin planı və ölçüsü”nün surəti.
  Şəxsiyyəti təsdiq edən sənəd Azərbaycan Respublikası vətəndaşları üçün şəxsiyyət vəsiqəsi, əcnəbilər və vətəndaşlığı olmayan şəxslər üçün isə Dövlət Miqrasiya Xidməti tərəfindən təqdim olunmuş müvəqqəti və ya daimi yaşamaq hüququ verən icazə vəsiqəsi, qaçqın vəsiqəsidir.

18 yaşına (16 yaşına çatmayanlara VÖEN verilmir) çatmamış şəxslər üçün ərizə ilə birgə müraciət edənin şəxsiyyət vəsiqəsi, valideynlərin, övladlığa götürənlərin və ya himayəçinin razılığına əsasən qəyyumluq və himayəçilik orqanının qərarı, belə razılıq olmadıqda isə məhkəmənin qərarı təqdim edilir.

Ərizə ərazi prinsipi nəzərə alınmaqla vergi ödəyicilərinə xidmət mərkəzlərinə (Bakı şəhərində və “ASAN Xidmət” mərkəzlərinin yerləşdiyi inzibati ərazi vahidlərindəki xidmət mərkəzləri istisna olmaqla), “ASAN Xidmət” mərkəzlərinə, “KOB evlərinə” təqdim oluna bilər. ƏDV ödəyicisi olacaq fiziki şəxslər isə ərizə ilə birgə “Vergi ödəyicisinin əlavə dəyər vergisinin məqsədləri üçün qeydiyyata alınması haqqında ərizə” təqdim etməlidirlər.

Eyni zamanda, xidmət tam elektronlaşdırılıb və İnternet Vergi İdarəsi Portalı vasitəsilə də həyata keçirilir. Bununla yanaşı, Çağrı Mərkəzi (195-1) vasitəsilə adıçəkilən xidmət qismən elektronlaşıb (media subyektləri, torpaq mülkiyyətçiləri və ailə kəndli təsərrüfatının başçılarına münasibətdə istisna olmaqla).

Ətraflı məlumat üçün:

https://www.taxes.gov.az/az/page/xidmet-merkezleri

https://new.e-taxes.gov.az/eportal/az/login

https://www.taxes.gov.az/uploads/2024/telimat/

https://www.taxes.gov.az/az/page/elektron-xidmetler

https://www.taxes.gov.az/az/page/vs2023

Mənbə: vergiler.az

İdxal zamanı daxil olan malların yük gömrük bəyannaməsi (YGB) və qısa idxal yük gömrük bəyannamələri haqqında vergi orqanına məlumat verilməlidirmi?

İqtisadiyyat Nazirliyi yanında Dövlət Vergi Xidmətindən bildirilib ki, Vergi Məcəlləsinin 16.1.11-11-ci maddəsinə əsasən, neft-qaz sahəsində fəaliyyəti olan və ya dövlət sektoruna aid edilən, habelə “Yaşıl dəhliz” buraxılış sistemindən istifadə edən vergi ödəyiciləri istisna olmaqla, digər vergi ödəyiciləri tərəfindən idxal ediləcək mallar barədə müvafiq icra hakimiyyəti orqanının müəyyən etdiyi orqan (qurum) tərəfindən təsdiq edilən formada aşağıdakı məlumatları malların gömrük nəzarətindən çıxdığı vaxtadək (hava nəqliyyatı ilə daşınan malların gömrük nəzarətindən çıxdığı vaxtdan 1 iş günü müddətində) uçotda olduğu vergi orqanına vermək vergi ödəyicilərinin vəzifələrinə aid edilir.

Vergi ödəyiciləri təqdim etdikləri məlumatda mülkiyyət, icarə və ya digər əşya hüquqları əsasında istifadə edilən və (və ya) vergi orqanlarında təsərrüfat subyekti (obyekti) kimi uçota alınmış malların saxlanılacağı (boşaldılacağı) yer barədə, mallar digər şəxslərə məxsus yerlərdə məsuliyyətli mühafizəyə və ya saxlanca verildiyi halda tərəflər arasında bağlanmış müqavilə və malların saxlanma yeri barədə, mallar sifariş əsasında gətirildiyi halda isə sifariş verən şəxslər barədə (sifarişçi vergi ödəyicisi olduqda VÖEN-i, fiziki şəxs olduqda adı, soyadı, atasının adı və FİN-i) və hər bir sifarişçi üzrə sifarişin məbləği barədə məlumatları qeyd etməlidir.

Vergi ödəyicisinin vergi orqanında uçota alınmış bir təsərrüfat subyekti (obyekti) olduğu halda bu maddədə nəzərdə tutulan məlumat forması vergi orqanına təqdim edilmir. Bu halda idxal edilmiş mallar həmin təsərrüfat subyektinə (obyektinə) boşaldılmış hesab olunur.

Nəzərinizə çatdırırıq ki, Vergi Məcəlləsinin 57.5-ci maddəsinə əsasən, idxal edilmiş mallar barədə bu Məcəllənin 16.1.11-11-ci maddəsində göstərilən məlumatları təqdim etməyən və ya təhrif olunmuş formada təqdim edən vergi ödəyicisinə müvafiq olaraq idxal edilmiş malların hesab-faktura (invoys) dəyərinin və ya onun təhrif olunmaqla təqdim edilmiş hissəsinin mikro sahibkarlıq subyektlərinə münasibətdə 2 faizi miqdarında, digər şəxslərə münasibətdə 5 faizi miqdarında maliyyə sanksiyası tətbiq edilir.

Əsas: Vergi Məcəlləsinin 16-cı, 57-ci maddələri.

Mənbə: vergiler.az

Ölkəmizdə mühasiblərin əmək fəaliyyətinin inkişaf etdirilməsi məqsədi ilə Peşəkar Mühasib Sertifikatı (PMS) imtahanlarında təkmilləşdirmələr davam etdirilir. Bakı Karyera Mərkəzinin direktoru, vergi eksperti Təhməz Qaçayev imtahanda sadələşdirilmiş vergi ilə bağlı verilən sualların mahiyyətini izah edir.

Sadələşdirilmiş vergi ilə bağlı sualda təqdim olunan cədvəldə iştirakçılardan tələb olunan cavablar “vergitutma obyekti”, “vergitutma bazası” və “sadələşdirilmiş verginin məbləği” ilə bağlıdır.
Vergitutma obyekti və vergitutma bazası vergitutmanın əsas elementlərindən olmaqla, Vergi Məcəlləsinin 12-ci maddəsi ilə müəyyən olunur. Qısaca desək, vergitutma obyekti – verginin yaranma mənbəyi, vergitutma bazası isə vergitutma obyektinin vergi tutulan hissəsinin kəmiyyətlə ifadəsidir.

Misal: Sadələşdirilmiş vergi ödəyicisinin 1-ci rübdə əməliyyatları aşağıdakı kimidir:

Malların təqdim edilməsi üzrə 25.000 manat;

İstiqrazlar üzrə gəliri – 800 manat;

Dövlət büdcəsinə olan vergi borcunun bağışlanılmasından gəliri – 500 manat.

Təqdim edilən malların dəyərinin 2.000 manatı hesabat dövründə ödənilməyib.

Burada vergitutma obyekti, vergitutma bazası və sadələşdirilmiş vergi məbləğinin tapılması tələb olunur.

İlk növbədə vergitutma obyektini müəyyən edək. Vergi Məcəlləsinin 219.1-ci maddəsinə əsasən, sadələşdirilmiş vergi ödəyiciləri üçün vergitutma obyekti – malların (iş və xidmətlərin), əmlak təqdim olunmasından əldə olunan ümumi hasilat və satışdan kənar (ödəmə mənbəyində vergi tutulanlar istisna olmaqla ) gəlirlərdir.

Misalımızda təqdim edilən malların dəyəri 25.000 manat olsa da 2000 manat hesabat dövrü üzrə ödənilmədiyi üçün hasılat 23.000 manat qəbul edilir:

25000 – 2000 = 23000 manat.

İstiqrazlardan (800 manat) və dövlət büdcəsindən vergi borcunun bağışlanılması (500 manat) gəliri isə satışdan kənar gəlir kimi vergitutma obyekti hesab edilir. Beləliklə, vergitutma obyekti olan vəsaitlər ümumilikdə 24.300 manatdır:

23000 + 800 + 500 = 24300 manat.

Vergitutma bazası isə vergitutma obyektinin vergi tutulan hissəsi olduğu üçün vergitutma obyektindən azad olan hər hansı gəlir növünü çıxmalıyıq. Vergi Məcəlləsinin 218-1-ci maddəsinə əsasən, misalımızda dövlət büdcəsinə vergi borcunun bağışlanılması üzrə gəlir (500 manat) vergidən azad edilir.

Vergitutma bazası: 24300 – 500 = 23800 manat.

Sadələşdirilmiş verginin dərəcəsi isə 2%-dir.

Sadələşdirilmiş verginin məbləği: 23800 x 2% = 476 manat.

Mənbə: vergiler.az