Blog Full

25 il işlədikdən sonra ixtisara düşmüşəm. İş yerindən bildirilib ki, mənə müəyyən miqdarda birdəfəlik ödəniş veriləcək. Bilmək istərdim ki, bu ödənişlərdən hansısa vergi tutulurmu?

İqtisadiyyat Nazirliyi yanında Dövlət Vergi Xidmətindən bildirilib ki, işçilərin sayı və ya ştatlar ixtisar olunduqda əmək müqaviləsi Əmək Məcəlləsinin 70-ci maddəsinin “b” bəndi ilə ləğv edilməzdən əvvəl işçi işəgötürən tərəfindən, əmək stajından asılı olaraq, aşağıdakı müddətlərdə rəsmi xəbərdar edilməlidir:

– İşçinin əmək stajı bir ilədək olduqda – azı iki təqvim həftəsi;

– Bir ildən beş ilədək olduqda – azı dörd təqvim həftəsi;

– Beş ildən on ilədək olduqda – azı altı təqvim həftəsi;

– On ildən çox olduqda – azı doqquz təqvim həftəsi.

Əmək müqaviləsi Əmək Məcəlləsinin 70-ci maddəsinin “a” və “b” bəndləri ilə ləğv edilərkən işçiyə işəgötürən tərəfindən bağlanmış əmək müqaviləsinə (əmək müqavilələrinə) uyğun müəyyən edilmiş əmək stajından asılı olaraq, aşağıdakı məbləğlərdə işdənçıxarma müavinəti ödənilir.

– 1 ilədək əmək stajı olduqda – orta aylıq əməkhaqqı miqdarında;

– 1 ildən 5 ilədək əmək stajı olduqda – orta aylıq əməkhaqqının azı 1.4 misli miqdarında;

– 5 ildən 10 ilədək əmək stajı olduqda – orta aylıq əməkhaqqının azı 1,7 misli miqdarında;

– 10 ildən çox əmək stajı olduqda – orta aylıq əməkhaqqının azı iki misli miqdarında.

Əlavə olaraq bildirilib ki, Vergi Məcəlləsinin 102.1.14-cü maddəsinə əsasən, əmək qabiliyyətinin müvəqqəti itirilməsinə görə ödənilən müavinətlər istisna olmaqla, dövlət müavinətləri, əvəzsiz dövlət köçürmələri, dövlət pensiyaları, dövlət təqaüdləri, işçilərin sayının və ştatların ixtisar edilməsi ilə əlaqədar əmək müqaviləsinə xitam verildikdə, işçilərə Əmək Məcəlləsinə müvafiq ödənilən təminatlar, habelə Azərbaycan Respublikasının qanunları və müvafiq icra hakimiyyəti orqanlarının qərarları əsasında dövlət büdcəsinin vəsaiti hesabına fərdi birdəfəlik ödəmələr və ya maddi yardımlar gəlir vergisindən azaddır.

Mənbə: vergiler.az

Bu ilin yanvar ayının sonunda dövriyyədə olan ödəniş kartlarının sayı 2025-ci ilin dekabr ayına nəzərən 176 min ədəd artaraq 22,156 milyon ədəd təşkil edib.

Azərbaycan Mərkəzi Bankının hesabatına əsasən, ötən ilin müvafiq dövrü ilə müqayisədə bu göstərici 11 faiz artıb. Ödəniş kartlarında debet kartlarının sayı 13,3 faiz artıb, kredit kartlarının sayı isə 7,6 faiz azalıb. Ödəniş kartlarının artması nağdsız ödənişlərin həcminə müsbət təsir göstərib. Belə ki, yanvar ayı ərzində ölkədaxili nağdsız əməliyyatların həcmi keçən ilin müvafiq dövrü ilə müqayisədə 11,4 faiz artıb.

2026-cı ilin yanvar ayı ərzində kartlar vasitəsilə həyata keçirilən ölkədaxili nağdsız ödənişlərin həcmi 7,687 milyon manat təşkil edib. Həyata keçirilən nağdsız ödənişlərin 6,600 milyon manatı elektron ticarətin payına düşüb. Qalan məbləğin 1,085 milyon manatı POS-terminallar, 3 milyon manatı isə özünəxidmət terminalları və bankomatlar vasitəsilə gerçəkləşdirilib. Yanvar ayı üzrə ödəniş kartları ilə nağdsız ölkədaxili əməliyyatların həcmi ölkədaxili kart əməliyyatlarının 70,6 faizini təşkil edib.

Mənbə: vergiler.az

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti Əmək Məcəlləsinə edilmiş son dəyişikliklərdən birinin sadə izahını verib.

İzaha görə, əgər uşaq gözlənilən tarixdən gec doğularsa, ana üçün doğuşdan əvvəlki məzuniyyət həmin gecikən günlər qədər uzadılır.

Bu əlavə günlər:

• Ödənişlidir;

• Doğuşdan sonrakı məzuniyyət günləri azaldılmır.

Yəni ana heç bir gün itirmir və hüquqları tam qorunur.

Bu dəyişiklik Beynəlxalq Əmək Təşkilatının 183 nömrəli Konvensiyasının 4-cü maddəsinin 5-ci bəndinə uyğunlaşdırılıb.

Qeyd edək ki, həmin Konvensiyaya əsasən analıq məzuniyyətinin minimum müddəti 14 həftə müəyyən edilsə də, ölkəmizin əmək qanunvericiliyində analıq məzuniyyəti üçün minimum 18 həftəlik hüquq nəzərdə tutulub.

Mənbə: vergiler.az