Blog Full

İşlədiyim müəssisədə direktor dəyişikliyi olacaq. Bu zaman vergi orqanında qeydiyyat üçün yeni direktor müraciət etməlidir, yoxsa əvvəlki rəhbər?

İqtisadiyyat Nazirliyi yanında Dövlət Vergi Xidmətindən bildirilib ki, rəhbər dəyişikliyinin qeydiyyata alınması üçün həmin dəyişikliyin baş verdiyi andan 40 iş günündən gec olmayaraq vergi orqanına müvafiq ərizə, yeni rəhbərin təyin olunması barədə qərar və yeni rəhbərin şəxsiyyətini təsdiq edən sənədin surəti ilə müraciət edilməlidir. Sənədlər vergi orqanına təqdim edildikdən sonra 5 iş günü müddətində dəyişiklik həyata keçirilir. Eyni zamanda dəyişiklikdən sonra yeni təyin edilmiş rəhbər tərəfindən yeni Asan İmza sertifikatı əldə edilməlidir.

Sorğuya cavab olaraq o da bildirilib ki, ərizə yeni qanuni təmsilçi tərəfindən təqdim olunmalıdır.

Əsas: Dövlət Vergi Xidmətinin 14 aprel 2023-cü il tarixli 2317040100442700 saylı əmri ilə təsdiq olunmuş “Vergi ödəyicilərinə göstərilən xidmətlərin vahid standartları”

Mənbə: vergiler.az

Çinin Maliyyə Nazirliyi cümə günü ölkənin ən iri tikinti şirkəti “Evergrande”nin audit məsələsi ilə bağlı “PwC”nin Çindəki audit şirkətini altı aylıq biznes fəaliyyəti dayandırılmasına dair cəza tətbiq edib.

Requlyator bu barədə məlumat verib.

Nazirlik həmçinin “PwC”nin Çində qeydiyyatda olan əsas törəməsi “PwC Zhong Tian LLP”yə 116 milyon yuan (16 milyon dollar) məbləğində cərimə tətbiq edib.

Çinin qiymətli kağızlar üzrə tənzimləyici orqanı ayrı bir bəyanatda bildirib ki, “Evergrande” işinə aid bölmənin 27.7 milyon yuan gəlirini müsadirə edib və 297 milyon yuan cərimə tətbiq edib.

Çin tarixində ən böyük maliyyə fırıldaqçılığı araşdırmalarından birinə başladıqdan sonra “PwC” diqqət mərkəzindədir. Hakimiyyət orqanları tikinti şirkəti “Evergrande”nin əsas daxili bölməsi “Hengda”nın 2020-ci ilə qədər iki il ərzində gəlirlərini 564 milyard yuan dəyərində şişirtdiyini bəyan edib.

Xatırladaq ki, daha əvvəl Çin “Deloitte” audit şirkətini də eyni məsələyə görə cərimələmişdi.

(1 ABŞ dolları = 7.0942 çin yuanı)

Mənbə: banker.az

Vergi Məcəlləsinin 174.5-ci maddəsinə əsasən, tibb müəssisələrinin və özəl tibbi praktika ilə məşğul olan fiziki şəxslərin hesabat dövrü ərzində əhaliyə göstərilən tibbi xidmətlər üzrə nağdsız qaydada POS-terminal vasitəsilə aparılan ödəmələr əsasında formalaşan dövriyyəsinin 50 faizi 2024-cü il yanvarın 1-dən 3 il müddətinə onun vergi tutulan ümumi dövriyyəsindən çıxılır. Nağdsız ödəmələr nəzarət-kassa aparatına vahid əməliyyat sistemində inteqrasiya edilmiş POS-terminal vasitəsilə aparılmalıdır.

İqtisadçı ekspert Anar Bayramov qanunvericiliyin bu tələbini şərh edir.

Vergi Məcəlləsinə 2024-cü ildə əlavə edilən 174.5-ci maddənin məqsədi tibb sektorunda ƏDV ilə bağlı stimullaşdırmanın həyata keçirilməsidir. Tibb sektoru üzrə əvəzləşdirilən ƏDV ilə bağlı dövriyyənin yüksək olmaması səbəbindən Vergi Məcəlləsinə 174.5-ci maddə əlavə edilib. Maddə ilə bağlı diqqət yetirilməli 5 vacib məqam mövcuddur.

Birinci məqam

Güzəştin edilməsi yalnız əhaliyə göstərilən tibbi xidmətlər üzrə nəzərdə tutulub. Tibb müəssisələrinin və özəl tibbi praktika ilə məşğul olan fiziki şəxslərin elektron qaimə-faktura üzrə həyata keçirdiyi əməliyyatlar Vergi Məcəlləsinin 174.5-ci maddəsinin əhatə dairəsinə düşmür.

İkinci məqam

Əhali tərəfindən ödənişlər mütləq nağdsız qaydada POS-terminal vasitəsilə aparılmalıdır. Əhali ödənişləri nağd formada və ya ödəniş terminalları vasitəsilə nağdsız formada həyata keçirərsə, o zaman tibb sektoru üzrə güzəşt tibb müəssisələri və özəl tibbi praktika ilə məşğul olan fiziki şəxslərə şamil edilməyəcək.

Üçüncü məqam

Güzəşt müddətlidir. Vergi Məcəlləsinin 174.5-ci maddəsi üzrə güzəşt 2024-cü il yanvarın 1-dən 3 il müddətinə qüvvədə olacaq.

Dördüncü məqam

Vergi Məcəlləsinin 174.5-ci maddəsində ƏDV üzrə güzəştin tətbiq edilməsinin (tibbi xidmətlərin göstərilməsi zamanı POS-terminal üzrə ödənişin) vətəndaşın “ƏDV geri al” layihəsi üzrə geri alınacaq məbləğə təsir etməməsidir.

Beşinci məqam

Vergi ödəyicisinin ƏDV dövriyyəsinin müəyyən edilməsi ilə bağlıdır. Vergi Məcəlləsinin 174.5-ci maddəsində qeyd edilir ki, əhaliyə göstərilən tibbi xidmətlər üzrə nağdsız qaydada POS-terminal vasitəsilə aparılan ödəmələr əsasında formalaşan dövriyyəsinin 50 faizi 2024-cü il yanvarın 1-dən 3 il müddətinə onun vergi tutulan ümumi dövriyyəsindən çıxılır.

Misal: Tibb müəssisəsi olan ƏDV ödəyicisi 2024-cü ilin fevral ayında 30.000 (ƏDV-siz) manat məbləğində tibbi xidmət göstərib. Həmin xidmətlərin 5.000 manat (ƏDV-siz) məbləğindəki hissəsi POS-terminal vasitəsilə əhaliyə göstərilib. Bu zaman vergi ödəyicisi fevral ayı üzrə ƏDV bəyannaməsində 2.500 manatı (5000 x 50%) azaldılan dövriyyə qeyd etdiyi üçün dövlət büdcəsinə 5.400 manat yox, 4.950 manat məbləğində ƏDV-ni bəyan edəcək:

30.000 x 18% = 5.400 manat;

5.400 – (2.500 x 18%) = 4.950 manat.

Sonuncu məqam

ƏDV üzrə azaldılan məbləğin vergi ödəyicisinin gəliri kimi nəzərə alınmasıdır. Tibb müəssisələri və özəl tibbi praktika ilə məşğul olan fiziki şəxslər üzrə ƏDV məbləğinin azaldılmasından əldə edilən gəlirlər üzrə tam güzəştin olunması ilə bağlı müvafiq olaraq Vergi Məcəlləsinin106.1.34-cü və 102.1.41-ci maddələrində qeydlər aparılıb. Misalımıza uyğun olaraq, 450 manat (2.500 x 18%) ƏDV məbləğinin azaldılmasından əldə edilən gəlirlər mənfəət (gəlir) vergisi üzrə nəzərə alınmayacaq.

Mənbə: vergiler.az

Əməkhaqqından məcburi dövlət sosial sığorta (MDSS) haqqının tutulması ilə bağlı yaranan sualımıza cavab axtarırıq. İşçinin bir aydan digər aya keçən əmək məzuniyyəti olduğu halda MDSS haqqı necə hesablanır? Belə olan halda məzuniyyət haqqı birinci ayın əməkhaqqı məbləği ilə cəmlənərək MDSS haqqına cəlb olunur, yoxsa hər ayın məzuniyyət məbləği ayrı-ayrılıqda həmin ayların əməkhaqqı məbləğləri ilə cəmlənərək ayrılıqda MDSS haqqı hesablanıb tutulur?

Suala cavab olaraq İqtisadiyyat Nazirliyi yanında Dövlət Vergi Xidmətindən bildirilib ki, işəgötürənin təqdim etdiyi gəlir vergisi, sosial ayırma və işsizlikdən sığorta haqqı üzrə hesabatlarda işçinin hər ay üçün işlədiyi günlərə görə aldığı əməkhaqqı və məzuniyyət ödənişləri cəmlənməlidir.

Əmək Məcəlləsinin 140-cı maddəsinin (Məzuniyyət vaxtı üçün orta əməkhaqqının hesablanması qaydası və ödənilməsi) birinci hissəsinə əsasən, məzuniyyət vaxtı üçün ödənilən orta əməkhaqqı onun hansı iş ili üçün verilməsindən asılı olmayaraq məzuniyyətin verildiyi aydan əvvəlki 12 təqvim ayının orta əməkhaqqına əsasən müəyyən edilir.

Məzuniyyət günlərinin əməkhaqqını müəyyən etməkdən ötrü məzuniyyətdən əvvəlki 12 təqvim ayının əməkhaqqının cəmlənmiş məbləğini 12-yə bölməklə orta aylıq əməkhaqqının məbləği tapılır və alınan məbləği ayın təqvim günlərinin orta illik miqdarına – 30,4-ə bölmək yolu ilə bir günlük əməkhaqqının məbləği müəyyən edilir.

Müəyyən edilmiş bir günlük əməkhaqqının məbləği məzuniyyətin müddətinin təqvim günlərinin sayına vurulur.

Bəs işçi 12 aydan az işlədikdə məzuniyyət haqqı necə hesablanmalıdır? Əmək Məcəlləsinin 140-cı maddəsinin ikinci hissəsində qeyd edilir ki, 12 təqvim ayından az işləyib məzuniyyətə çıxan işçinin orta aylıq əməkhaqqı onun faktiki işlədiyi tam təqvim aylarına əsasən hesablanır.

Bildirilib ki, kompensasiyalar ödənilərkən tam iş illərinin kompensasiya haqları ayrı-ayrılıqda, o cümlədən cari iş ilinə görə istifadə olunmamış məzuniyyətə görə ödənilən kompensasiya haqqı ödəniş aparılan ayın əməkhaqqına əlavə edilmədən ayrılıqda fiziki şəxslərin gəlir vergisinə və məcburi dövlət sosial sığorta haqlarına cəlb edilir. İşəgötürənin təqdim etdiyi gəlir vergisi, sosial ayırma və işsizlikdən sığorta haqqı üzrə hesabatlarda işçinin hər ay üçün işlədiyi günlərə görə aldığı əməkhaqqı və məzuniyyət ödənişləri cəmlənməlidir.