Blog Full

Birbank-ın gənc mütəxəssislərin peşəkar inkişafını dəstəkləmək məqsədilə həyata keçirdiyi “PO Growth” proqramına start verildi. Proqram məhsul sahibliyi sahəsində karyera qurmaq istəyənlərə nəzəri biliklərlə yanaşı praktiki təcrübə qazanmaq imkanı da yaradacaq.

“PO Growth” proqramına ümumilikdə 493 namizəd müraciət edib və yalnız 33 nəfər bütün seçim mərhələlərini uğurla keçərək iştirakçı olmaq şansı qazanıb. Proqramın əsas özəlliklərindən biri təlimin 5 moduldan ibarət olması və hər modulu fərqli ekspertlərin aparmasıdır. Bu ekspertlər arasında ofis liderləri, məhsul sahibləri, ekspert mərkəzi liderləri və “Agile” metodologiya üzrə yerli mütəxəssislər yer alıb. Ümumilikdə 28 təlimçi iştirakçıların bilik və bacarıqlarının inkişafına töhfə verəcək.

Təlimlər məhsulun ideya mərhələsindən başlayaraq, onun müştəriyə çatdırılması və sonrakı analiz mərhələsinə qədər bütün prosesi əhatə edəcək. Bu zaman həm texniki biliklərə, həm də yumşaq bacarıqların formalaşdırılmasına xüsusi diqqət ayrılacaq. Proqram “Agile” metodologiya prinsipləri əsasında təşkil olunub ki, bu da iştirakçılara real iş mühitinə daha sürətli adaptasiya olmaq vərdişləri qazandıracaq.

Qeyd edək ki, Birbank ölkənin ilk banklarından biridir ki, 2018-2020-ci illərdən etibarən “Agile” metodologiyanı öz iş proseslərinə tətbiq etməyə başlayıb. Bu yanaşma sayəsində bankın məhsul inkişafı prosesi daha səmərəli və müştəriyönümlü şəkildə qurulub. Məhz bu təcrübə əsasında yaradılan “PO Growth” proqramı gələcək məhsul sahiblərinin çevik düşüncə tərzində yetişdirilməsini hədəfləyir.

Proqramın açılış mərasimində çıxış edən Kapital Bank-ın İdarə Heyətinin üzvü, İnsan kapitalı və Təşkilati inkişaf üzrə Baş inzibatçı Fərqanə Məmmədova proqramın əhəmiyyətini vurğulayaraq bildirib: “Birbank olaraq, biz rəqəmsal məhsul idarəetməsi sahəsində əldə etdiyimiz bilik və təcrübəni yeni nəslə ötürməyi, onların inkişafına dəstək verməyi özümüz üçün böyük məsuliyyət və eyni zamanda qürur hesab edirik. İnanırıq ki, “PO Growth” proqramı gənclər üçün həm peşəkar karyera, həm də şəxsi inkişaf baxımından yeni imkanlar yaradacaq. Bu yolda sizə uğurlar arzu edir və gələcək uğurlarınızı səbirsizliklə gözləyirik”.

Birbank-ın həyata keçirdiyi “PO Growth” proqramı, həm bank sektorunda karyera qurmaq istəyənlər, həm də məhsul idarəçiliyi sahəsində peşəkar biliklərini artırmaq arzusunda olanlar üçün dəyərli platforma olacaq. Proqram 4 ay davam edəcək və iştirakçılar bu müddət ərzində intensiv təlimlər və real iş mühiti ilə tanış olacaqlar. Bu, Birbank-ın ölkədə insan kapitalının inkişafı və çevik idarəetmə mədəniyyətinin yayılması istiqamətindəki səylərinin növbəti uğurlu addımıdır.

Daim ən son rəqəmsal yeniliklər və bank məhsulları təqdim edən Birbank 3 milyondan çox aktiv istifadəçisi olan mobil tətbiqi, 119 filialı və 54 şöbəsindən ibarət Azərbaycanda ən böyük filial şəbəkəsi ilə müştərilərinin xidmətindədir. Bank 2025-ci ilədək ölkənin birinci bankı Kapital Bank adı altında müştərilərinə xidmət göstərib və Paşa Holding-ə daxildir. Kapital Bank isə hazırda maliyyə institutu olaraq fəaliyyətini davam etdirir. Bankın məhsul və xidmətləri barədə daha ətraflı məlumat almaq üçün  https://birbank.az/ saytına, 196 Sorğu Mərkəzinə və ya Bankın müxtəlif sosial şəbəkələrdə olan səhifələrinə müraciət edə bilərsiniz.

2024-cü ilin yanvarın 1-dən Vergi Məcəlləsində edilən dəyişikliklərdən biri də işçilərin mənzil və yemək xərclərinin gəlirdən çıxılması normaları ilə bağlı idi. Azərbaycan Respublikası Nazirlər Kabinetinin 22 noyabr 2024-cü il tarixli Qərarı ilə “Nümayəndəlik xərclərinin, işçilərin mənzil və yemək xərclərinin, eləcə də əmək şəraiti zərərli, ağır olan və yeraltı işlərdə çalışan işçilərə verilən müalicə-profilaktik yeməklərlə, süd və ona bərabər tutulan digər məhsullar və vasitələrlə bağlı xərclərin vergitutma məqsədləri üçün gəlirdən çıxılması normaları və qaydası” təsdiq edilib. Bəs hansı hallarda bu ödənişlər işçinin vergi tutulan gəlirlərinə aid edilir?

İqtisadiyyat Nazirliyi yanında Dövlət Vergi Xidmətinin Vergi siyasəti Baş idarəsinin rəis müavini Əvəz Quliyev “Vergi və Mühasibatlıq Zirvəsi 2025″in “Vergilər: Menecment və Vizyon” panelində həmin məqamlara aydınlıq gətirib və işçilərin yemək xərclərinin rəsmiləşdirilməsi ilə bağlı vacib məqamlara toxunub.

Onun sözlərinə görə, işçilərin yemək xərcləri ilə bağlı müvafiq normalar, 2024-cü ilin noyabr ayında təsdiq edilməsinə baxmayaq, 2024-cü il ərzində vergi ödəyicilərinin sözügedən qərarla müəyyən olunmuş qaydada çəkdiyi yemək xərclərinə tətbiq olunur: “İşçilərin yemək xərclərinin çəkilməsi ilə bağlı 3 formada norma müəyyən olunub – yemək xərcinin əvəzi birbaşa işçinin özünə ödənildikdə, yeməyin hazırlanması işəgötürənin özü tərəfindən təmin edildikdə, iaşə xidməti ictimai iaşə fəaliyyəti göstərən digər vergi ödəyicisindən alındıqda.

Yemək xərcinin əvəzi birbaşa işçinin özünə nağdsız ödənildiyi halda işçiyə norma daxilində ödənilən yemək xərcinin əvəzi, Vergi Məcəlləsinin 98.5-ci maddəsinə əsasən, işçinin vergitutulan gəlirlərinə aid edilmir və həmin gəlirlər gəlir vergisinə və məcburi dövlət sosial sığorta haqqına cəlb olunmur.

İşçiyə normadan artıq ödənilən yemək xərcinin qanunvericiliklə müəyyən edilmiş normadan artıq olan hissəsi işçinin vergi tutulan gəlirlərinə daxil edilir. Bu zaman həmin hissə gəlir vergisinə və məcburi dövlət sosial sığorta haqqına cəlb olunur.

Bununla yanaşı, işçilərin yeməklə təmin olunması işəgötürənin özü tərəfindən həyata keçirilməklə və ya iaşə xidməti göstərən şəxslərlə bağlanan müqavilə əsasında təmin edildikdə çəkilən yemək xərcləri norma daxilində işəgötürən şəxsin gəlirdən çıxılan xərclərinə aid edilir.

Bu zaman çəkilən xərclər qanunvericiliklə müəyyən edilmiş normadan artıq olduqda, yəni dolayısı ilə işçi maddi formada bundan faydalanırsa, bu xərclərin norma daxilində və ya normadan artıq olmasından asılı olmayaraq, işçinin vergi tutulan gəliri formalaşmır”.

Ə.Quliyev vurğulayıb ki, ümumilikdə, norma daxilində və ya normadan artıq çəkilən yemək xərcləri əməkhaqqının tərkibinə daxil edilməyən sosial xarakterli xərclər olduğundan, işsizlikdən sığorta haqqına və icbari tibbi sığorta haqqına cəlb olunmur.

O, həmçinin, əlavə edib ki, işçiyə yemək xərci ilə bağlı nağdsız ödəniş həyata keçirilirsə, ödənişin təyinatında bu ödənişlərin yemək xərci ilə bağlı olması qeyd olunmalıdır. İşçinin yemək xərcləri 3-cü şəxsə ödənilirsə və ya yeməyin hazırlanması işəgötürənlərin özləri tərəfindən təmin edilirsə, aparılan əməliyyat Vergi Məcəlləsi ilə müəyyən edilmiş qaydada, o cümlədən elektron qaimə-faktura ilə rəsmiləşdirilir. Bu zaman ictimai iaşə fəaliyyəti göstərən şəxs tərəfindən təqdim edilmiş elektron qaimə-fakturanın qeyd hissəsində ödənişin vergi ödəyicisinin işçilərinin yemək xərci ilə bağlı olması qeyd edilməlidir.

Mənbə: vergiler.az

“Azərbaycan Mühasiblər Məktəbi”nin “Kameral vergi məktublarının təhlili və cavablandırılması” mövzusunda təşkil etdiyi ödənişsiz vebinara qoşula bilməyənlər, keçid edərək video yazını izləyə bilərlər.

Vebinarın təqdimatçısı Salman Əbdülrzazadə İqtisad Universitetində “Biznesin təşkili və idarə edilməsi” ixtisası üzrə bakalavr, Türkiyənin Selçuk Universitetində “Mühasibat uçotu” ixtisası üzrə magistr təhsili almış və hazırda Selçuk Üniversitetində “Mühasibat uçotu” ixtisası üzrə doktorantura təhsili alır.

2019-2023-cü illər ərzində Azərbaycan Dövlət İqtisad Universitetində Mühasibat fənnini tədris etmişdir. Azərbaycan Mühasiblər Məktəbinin direktoru və peşəkar təlimçisidir. Eyni zamanda mühasibat uçotu və vergi sahəsində fəaliyyət göstərən “Accounting.Az” konsaltinq şirkətində layihə rəhbəri olaraq fəaliyyət göstərir. 500-dən çox mühasibin ixtisaslaşmasında yaxından iştirak etmişdir.

Qeyd edək ki, Azərbaycan Mühasiblər Məktəbi 2019-cu ildən bəri mühasiblərin ehtiyac duyduğu müxtəlif sahələrdə təlimlər həyata keçirir. Fəaliyyətə başladığımız vaxtdan bu günədək 3000-dən çox tələbə kurslarımızda iştirak etmişdir.

Kanalımıza abunə olmaqla, qoşula bilmədiyiniz vebinarları yenidən izləyə bilərsiniz: https://www.youtube.com/@muhasiblermekteb

Peşəkar Mühasib Sertifikatı imtahanına hazırlıq kursları

Mühasibat kursları

Vergi kursları

Mühasiblər üçün Excel kursları

Əlaqə:

Nazirlər Kabineti “Dövlət qulluqçusunun rotasiyası Qaydası” və “Rotasiya qaydasında yaşadığı inzibati ərazi vahidindən kənarda vəzifəyə təyin olunan dövlət qulluqçularına kompensasiya və birdəfəlik ödəniş verilməsi Qaydası”nı 20 fevral 2025-ci il tarixli 36 nömrəli Qərarı ilə təsdiq edib. Əmək qanunvericiliyi üzrə ekspert Nüsrət Xəlilov həmin qaydaları şərh edir:

Qaydalara əsasən, dövlət qulluqçusu rotasiya halında başqa vəzifəyə təyin edilərkən onun qulluq keçdiyi inzibati vəzifənin təsnifatı, ixtisası, xidməti fəaliyyətinin qiymətləndirilməsinin nəticəsi, qulluq stajı, habelə yaşı, ailə və sağlamlıq vəziyyəti nəzərə alınır. Müvafiq vəzifədə 5 ildən az qulluq keçən dövlət qulluqçusu rotasiya olunmur. Qeyd edək ki, rotasiya – inzibati vəzifə tutan dövlət qulluqçusunun qulluq keçdiyi dövlət orqanının rəhbərinin qərarı ilə bir vəzifədən başqa vəzifəyə keçirilməsi hesab edilir.

Rotasiyanın təşkili

Rotasiyanın tətbiq edildiyi vəzifələrdə qulluq müddəti 5 il müəyyən olunur. Komissiyanın əsaslandırılmış tövsiyəsi əsasında dövlət orqanının rəhbəri tərəfindən bu müddət hər dəfə, bir ildən çox olmamaqla, 2 dəfə uzadıla bilər. Rotasiyanın tətbiq olunduğu vəzifəyə keçirilən dövlət qulluqçusunun əmək müqaviləsində bununla bağlı dəyişikliklər edilir.

Rotasiya müvafiq ilin sentyabr ayında həyata keçirilir. Xidməti zərurətlə əlaqədar rotasiya ilin digər aylarında həyata keçirildikdə, dövlət qulluqçusuna rotasiya olunacağı vəzifə və vaxtı barədə ən azı 6 ay əvvəl rəsmi məlumat verilməlidir. Dövlət qulluqçusu öz təşəbbüsü və qulluq keçdiyi dövlət orqanının rəhbərinin razılığı əsasında rotasiya vəzifəsinə keçirilə bilər.

Aşağıdakı şəxslər onların razılığı əsasında rotasiya edilirlər:

• hamilə və üç yaşına çatmamış uşağı olan qadınlar, habelə üç yaşınadək uşağını təkbaşına böyüdən kişilər;
• öhdəsində əlilliyi olan uşağı və ya orqanizmin funksiyalarının 81-100 faiz pozulmasına görə əlilliyi müəyyən edilmiş ailə üzvü olan şəxslər;
• dövlət qulluğunda olmanın yaş həddinə iki ildən az müddət qalan şəxslər;
• müvafiq vəzifənin yerləşdiyi ərazinin səhhətinə mənfi təsir edə biləcəyi şəxslər (tibbi arayış əsasında);
• rotasiya vəzifələrinə azı 3 dəfə (ümumilikdə 15 ildən az olmayaraq) rotasiya olunan şəxslər.

Aşağıdakı dövrlərdə rotasiya müvəqqəti olaraq təxirə salınır:

• rotasiya olunanın fəaliyyətinə bilavasitə rəhbərlik və ya nəzarət etdiyi təşkilatın maliyyə-təsərrüfat fəaliyyətinin auditinin (yoxlama, təftiş) aparıldığı dövr;
• rotasiya olunan barəsində xidməti yoxlama (araşdırma) və ya cinayət işinin istintaqı aparıldığı dövr;
• rotasiya olunanın məzuniyyətdə və ya ezamiyyətdə olduğu, habelə əmək qabiliyyətini müvəqqəti itirdiyi dövr (tibbi arayış əsasında).

Bu halda rotasiya yuxarıda nəzərdə tutulan hallar aradan qalxdığı gündən 1aydan gec olmayaraq həyata keçirilməlidir.

Rotasiya dövlət qulluqçusunun yaşadığı inzibati ərazi vahidini dəyişməklə və ya dəyişməməklə həyata keçirilir. Dövlət qulluqçusunun yaşadığı inzibati ərazi vahidindən 50 kilometrdən çox uzaqlıqda yerləşən quruma qulluq keçmək üçün rotasiya olunması yaşadığı inzibati ərazi vahidini dəyişməklə aparılır.

Rotasiya olunan dövlət qulluqçularının və onların ailə üzvlərinin sosial təminatları

Dövlət rotasiya olunanların sosial və hüquqi müdafiəsinə, onların özləri və ailələri üçün layiqli həyat səviyyəsinin təmin edilməsinə zəmanət verir. “Dövlət qulluğu haqqında” Qanunun 30.5-ci maddəsinə əsasən, müvəqqəti olaraq başqa yerə qulluğa keçirilən dövlət qulluqçusunun ailəsini özü ilə aparmağa ixtiyarı vardır. Ona müəyyən edilmiş yaşayış normalarına uyğun gələn məişət ləvazimatı ilə komplektləşdirilmiş xidməti mənzil verilir, habelə əvvəl qulluq keçdiyi yerdəki yaşayış sahəsi saxlanılır. Dövlət qulluqçusunun ailə üzvlərinə işə və ya təhsil müəssisəsinə düzəlməkdə kömək göstərilir, məktəbəqədər təhsil müəssisələrində yer verilir və lazım gəldikdə, onu göndərən orqanın vəsaiti hesabına haqqı ödənilən tibbi xidmətlə təmin edilir. Müvəqqəti olaraq başqa yerə qulluğa keçirilməklə bağlı digər məsələlər Azərbaycan Respublikasının Əmək Məcəlləsi ilə tənzimlənir.

Qaydalara əsasən, yuxarıda nəzərdə tutulan təminatlarla yanaşı, rotasiya olunan dövlət qulluqçularına aşağıdakı təminatlar verilir:

• rotasiya qaydasında yaşadığı inzibati ərazi vahidindən kənarda vəzifəyə təyin olunan dövlət qulluqçularına ödənilən birdəfəlik ödəniş;
• rotasiya qaydasında yaşadığı inzibati ərazi vahidindən kənarda vəzifəyə təyin olunan dövlət qulluqçularına ödənilən aylıq pul kompensasiyası;
• rotasiya olunanla birlikdə yaşadığı inzibati ərazi vahidini dəyişmiş və bu səbəbdən iş yerlərini itirmiş ailə üzvlərinin işlə təmin olunma imkanlarının dəstəklənməsi;
• rotasiya olunanın övladlarının qulluq keçdiyi yaşayış məntəqəsində təhsil müəssisələrinə yerləşdirilməsi.

Rotasiya olunanla birlikdə yaşadığı inzibati ərazi vahidini dəyişmiş və bu səbəbdən iş yerlərini itirmiş ailə üzvlərinin (təsdiqedici sənədlər təqdim edilməklə) müraciəti əsasında onların məşğulluğunun təmini üçün “Məşğulluq haqqında” Qanuna uyğun tədbirlər görülür. Rotasiya olunanın ailə üzvləri yaşadıqları inzibati ərazi vahidini dəyişməmişdən əvvəl dövlət büdcəsindən maliyyələşdirilən təşkilatlarda əmək fəaliyyəti ilə məşğul olduqları halda, onlar həmin təşkilatların müvafiq rayon (şəhər) şöbələrində (təşkilatlarında) vakant vəzifənin olması nəzərə alınaraq işlə təmin edilə bilərlər.
Qaydalara görə, rotasiya olunanın ailə üzvü dedikdə, aşağıdakılar nəzərdə tutulur:

Ailə üzvü – rotasiya olunanla birlikdə yaşayan arvadı (əri), valideynləri, yetkinlik yaşına çatmayan uşaqları (övladlığa götürülənlər daxil olmaqla), himayəsində olan yetkinlik yaşına çatmayan bacıları, qardaşları, habelə arvadının (ərinin) valideynləri.

Aylıq kompensasiyalar

Azərbaycan Respublikası Nazirlər Kabinetinin 2025-ci il 20 fevral tarixli 36 nömrəli Qərarı ilə təsdiq edilmiş “Rotasiya qaydasında yaşadığı inzibati ərazi vahidindən kənarda vəzifəyə təyin olunan dövlət qulluqçularına kompensasiya və birdəfəlik ödəniş verilməsi Qaydası”na əsasən, həmin şəxslərə aşağıdakı ödənişlər ödənilir:

• Rotasiya qaydasında yaşadığı inzibati ərazi vahidindən kənarda vəzifəyə təyin olunan dövlət qulluqçularına 250 (iki yüz əlli) manat məbləğində aylıq pul kompensasiyası ödənilir.
• Rotasiya olunanla birgə yaşayan hər bir ailə üzvü üçün yuxarıda müəyyən edilmiş müvafiq kompensasiyanın 50 faizi məbləğində vəsait ödənilir.

Misal 1: İş yeri Bakı şəhərində yerləşən dövlət qulluqçusunun qeydiyyatı Xırdalan şəhərindədir və tarif maaşı 1.500 manatdır. O, rotasiya qaydasında Gəncə şəhərində öz işini davam etdirməlidir. Dövlət qulluqçusunun ailə üzvləri atası, anası, həyat yoldaşı, iki uşağı və himayəsində olan 20 yaşlı bacısı var. Bu halda ona nə qədər kompensasiya ödəniləcək?

Bu nümunədə dövlət qulluqçusuna maaşından əlavə olaraq aylıq 250 manat pul kompensasiyası, ailə üzvlərinə görə isə aşağıdakı məbləğdə kompensasiya ödəniləcək:

Göründüyü kimi, rotasiya olunan şəxsin 6 ailə üzvü var. Lakin onlardan 5-nə görə müəyyən olunmuş qaydada kompensasiya hesablanması həyata keçiriləcək. Çünki Qaydaların “Ümumi müddəalar” hissəsində ailə üzvləri anlayaşına izah verilərkən, “himayəsində olan yetkinlik yaşına çatmayan bacıları, qardaşları” ifadəsindən istifadə olunub. Mülki Məcəllənin 28-ci maddəsinə əsasən, şəxsin yetkinlik yaşı 18 yaş hesab edilir. Nümunədəki şəxsin bacısının 20 yaşı olduğu üçün yetkinlik yaşına çatmış hesab edilir və bu baxımdan ailə üzvlərinə daxil edilmir. Ona görə də 5 ailə üzvünə görə kompensasiya hesablanacaq və aylıq maaşdan əlavə olaraq, cəmi 875 manat məbləğdə vəsait veriləcək:

Özünə görə: 250 manat;
Ailə üzvlərinə görə: (250 x 50 %) x 5 nəfər = 625 manat;
Cəmi: 250 + 625 = 875 manat.

Rotasiyanın tətbiq edildiyi vəzifədə qulluq müddəti ərzində ailə üzvlərinin tərkibində hər hansı dəyişiklik olduqda, rotasiya olunan bu barədə 10 gündən gec olmayaraq, dövlət orqanının kadr qurumuna, strukturunda kadr qurumu nəzərdə tutulmayan dövlət orqanlarında isə kadr qurumunun funksiyalarını həyata keçirən kadr məsələləri üzrə məsul şəxsə məlumat verməlidir.
Yaşadığı inzibati ərazi vahidindən 50 kilometrdən artıq uzaqlıqda yerləşən quruma qulluq keçmək üçün rotasiya olunan, lakin yaşayış yerini dəyişməyən dövlət qulluqçusuna yalnız 250 manat məbləğində aylıq pul kompensasiyası ödənilir.

Misal 2: Dövlət qulluqçusu Xırdalan şəhərində qeydiyyatdadır və orada yaşayır. O, rotasiya qaydasında Ələt qəsəbəsində işini davam etdirəcək. Bu halda işçi yaşayış yerini dəyişməyəcək. Xırdalan şəhərindən Ələt qəsəbəsinə məsafə 80 kilometr ona yalnız 250 manat məbləğində aylıq pul kompensasiyası ödənilir.
Əmək Məcəlləsinin 21-1-ci maddəsinin şərtləri nəzərə alınmaqla, Azərbaycan Respublikasının işğaldan azad edilmiş ərazilərində qulluq keçmək üçün rotasiya olunan və ailə üzvləri üçün müəyyən edilmiş kompensasiyalara 1,5 əmsal tətbiq olunur.

Misal 3: İş yeri Bakı şəhərində yerləşən dövlət qulluqçusunun qeydiyyatı Xırdalan şəhərindədir. Onun tarif maaşı 1.500 manatdır. Dövlət qulluqçusu rotasiya qaydasında Şuşa şəhərində öz işini davam etdirəcək. Onun 3 ailə üzvləri həyat yoldaşı və iki uşağından ibarətdir. Bu halda işçiyə nə qədər kompensasiya ödəniləcək?

Əmək Məcəlləsinin 21-1-ci maddəsinə əsasən, Azərbaycan Respublikasının işğaldan azad edilmiş ərazilərində işləyən mütəxəssislər aşağıdakı şərtlər mövcud olduğu hallarda, bu Məcəllədə və Azərbaycan Respublikasının digər qanunlarında nəzərdə tutulan güzəştlərdən və imtiyazlardan istifadə etmək hüququna malikdirlər:

• mütəxəssislərin əmək müqaviləsi bağladıqları işəgötürən işğaldan azad edilmiş ərazilərdə vergi uçotunda olduqda;
• mütəxəssislərin əmək müqaviləsi üzrə iş yeri işğaldan azad edilmiş ərazilərində yerləşdikdə;
• mütəxəssislər işğaldan azad edilmiş ərazilərdə məskunlaşdıqda (yaşayış yeri və ya olduğu yer üzrə qeydiyyata alındıqda).

Qaydalara əsasən, yuxarıdakı meyarlara cavab verildiyi halda, işğaldan azad edilmiş ərazilərdə qulluq keçmək üçün rotasiya olunanlara və ailə üzvlərinə müəyyən edilmiş kompensasiyalara 1,5 əmsal tətbiq edilir. Bu halda, həmin dövlət qulluqçusuna aşağıdakı qayda və məbləğdə kompensasiya hesablanıb ödəniləcək:

Özünə görə: 250 x 1,5 = 375 manat;
Ailə üzvlərinə görə: (250 x 50%) x 3 =375 manat;
375 x 1,5 əmsal = 562,5 manat.
Cəmi: 375 + 562,5 = 937,5 manat.

Birdəfəlik ödəniş

Rotasiya qaydasında yaşadığı inzibati ərazi vahidindən kənarda vəzifəyə keçirilən dövlət qulluqçularına ölkə üzrə müəyyən edilmiş minimum aylıq əməkhaqqının 3 misli məbləğində birdəfəlik ödəniş verilir.

Misal 4: Yuxarıdakı nümunələrdəki dövlət qulluqçularına yeni inzibati ərazi vahidinə yerləşməsi üçün köç xərci və digər zəruri xərclərin ödənilməsi məqsədilə aylıq kompensasiyalardan əlavə, minimum aylıq əməkhaqqının 3 misli məbləğində birdəfəlik ödəniş veriləcək:
400 manat x 3 = 1.200 manat.

Qaydaya uyğun ödənilən birdəfəlik ödəniş işğaldan azad edilmiş ərazilərdə işləyən mütəxəssisə ilkin maddi məişət şəraitinin dəstəklənməsi üçün ödənilən müavinəti əvəz etmir. İşğaldan azad edilmiş ərazilərdə işləyən mütəxəssisə ilkin olaraq maddi-məişət şəraitinin dəstəklənməsi üçün 600 manat birdəfəlik müavinət verilir. Azərbaycan Respublikasının “Sosial müavinətlər haqqında” Qanununda dəyişiklik edilməsi barədə 9 dekabr 2022-ci il tarixli 683-VIQD nömrəli Qanunla bu müavinətin təyinatı 2023-cü il yanvarın 1-dən 2028-ci il yanvarın 1-dək olan dövr üçün nəzərdə tutulub.
Qaydaya uyğun olaraq, kompensasiya və birdəfəlik ödənişin verilməsi dövlət büdcəsi vəsaiti hesabına həyata keçirilir. Qaydanın qüvvəyə mindiyi günədək rotasiyanın tətbiq edildiyi sahələrə və vəzifələrə təyin edilən şəxslərə bu Qayda şamil edilmir. Qaydanın 2.1-ci bəndində nəzərdə tutulan (aylıq 250 manat) kompensasiyanın məbləğinə üç ildə bir dəfə yenidən baxılır.

Mənbə: vergiler.az