Gəlirdən çıxılmayan xərclər üzrə ödənilmiş ƏDV məbləği əvəzləşdirilə bilərmi?
Sual:
Belə bir sualla müraciət etmək istərdim. Gəlirdən çıxılmayan xərclər üzrə ödənilmiş xidmət haqlarının ƏDV məbləği əvəzləşdirilə bilərmi?
Cavab:
Bildiririk ki, gəlirdən çıxılmasına yol verilməyən xərclər Vergi Məcəlləsinin 109-cu maddəsinə əsasən müəyyənləşdirilir. Əlavə Dəyər Vergisi ödəyiciləri tərəfindən ödənilmiş ƏDV-nin əvəzləşdirilməsinə yol verilən hallar və məhdudiyyətlər Vergi Məcəlləsinin 175-ci maddəsində təsbit edilmişdir.
Əsas vəsaitlərin alınmasına və qurulmasına çəkilən xərclərin və bu Məcəllənin 143-cü maddəsinə uyğun olaraq kapital xarakterli digər xərclərin gəlirdən çıxılmasına yol verilmir, lakin həmin xərclərin ödənilməsi zamanı Vergi Məcəlləsinin 175-ci maddəsinin tələblərinə cavab verildiyi halda, həmin xərclər üzrə ödənilmiş Əlavə Dəyər Vergisinin əvəzləşdirilməsinə məhdudiyyət nəzərdə tutulmamışdır.
Mənbə: taxes.gov.az
