Azərbaycanda online nəzarət-kassa aparatlarına tam keçidin vaxtı açıqlanıb.
2023-cü ilin 1 yanvar tarixinə qədər bütün ölkə üzrə online nəzarət-kassa aparatlarının tətbiqi başa çatacaq.
Bunu Vergilər Nazirliyinin Dövlət qeydiyyatı və uçota nəzarət Departamentinin baş direktoru Ələkbər Məmmədov deyib.
Qeyd etdiyimiz kimi, Vergilər Nazirliyinin rəqəmsal texnologiyalardan istifadənin genişləndirilməsi sahəsində hədəflərindən biri online kassa aparatlarının tətbiqidir. Hazırda nəzarət-kassa aparatlarından nazirliyin sisteminə ötürülən məlumatlar ofline rejimdə həyata keçirilir.
Bu sahədə şəffaflığın təmin olunması üçün yaxın gələcəkdə online kassa aparatlarının tətbiqi planlaşdırılır. Nazirliyin informasiya sistemi ilə online kassa aparatı arasında məlumat mübadiləsi online rejimdə həyata keçiriləcəkdir ki, bu da sistemdə vergi ödəyicilərinin əməliyyat məlumatlarının daha dürüst olmasına və satış mühasibatlığında şəffaflığın təmin olunmasına şərait yaradacaq.
Bundan başqa, tezliklə hüquqi şəxslərin təsis sənədlərində dəyişiklikləri online rejimdə etmək mümkün olacaq, deyə Vergilər Nazirliyinin Departament rəisi nümayəndəsi vurğulayıb.
Ələkbər Məmmədovun sözlərinə görə, hazırda bu məsələ üzərində iş aparılır.
Mənbə: report.az
