Mark Zukerberg bir gün ərzində 7 milyard dollar itirdi.
Milyarder, Facebook-un yaradıcısı Mark Zukerberg bəzi iri şirkətlərin sosial şəbəkədə reklam yerləşdirməkdən imtina etməsindən sonra gün əzində 7,2 milyard dollar kasıblayıb. Bu haqda Bloomberg agentliyi məlumat verib.
Cümə günü, iyunun 26-da, dünyanın ən böyük reklam şirkətlərindən biri olan Unilever, ilin sonuna qədər bütün Facebook məhsullarında, o cümlədən İnstaqramda reklam xərcləməmək qərarını elan etdikdən sonra şirkətin səhmlərinin qiyməti 8,3 faiz aşağı düşüb.
Facebook-da reklamlardan həmçinin telekommunikasiya nəhəngi Verizon və dünyanın ən nəhəng konditer məhsulları istehsalçısı Hershey kimi şirkətlər də imtina ediblər. Coca-Cola şirkəti də reklam yerləşdirilməsini dayandırıb. Onlar bəyan ediblər ki, Facebook ABŞ-da baş verən etirazların fonunda “platformada nifrət və dezinformasiyanın yayılması təzahürlərinə kifayət qədər nəzarət edə bilməyib”.
Bloomberg Billionaire Index-nə görə Zukerbergin sərvətinin xalis dəyəri 82,3 milyard dollara qədər düşüb. Hazırda o, dünyanın ən varlı insanları sıralamasında dördüncü pillədədir.
Məlum olduğu kimi, 2020-ci ilin may ayında qaradərili Corc Floydun polis tərəfindən saxlanılarkən, sərt davranış nəticəsində ölümündən sonra ABŞ-ı etiraz dalğası bürümüşdü. Həyəcanlar və kütləvi iğtişaşlar onlarla ABŞ şəhərlərini öz ağşuna almışdı. Bəzi ştatlarda isə həmin iğtişaşlar talan, qarət, atışma və yanğınlarla müşaiyət olunmuşdu.