Oxunma sayı: 214
Peşəkar mühasib sertifikatı imtahanlarına dair birinci mərhələnin tarixləri elan olunub. İmtahanın birinci mərhələsi üçün qeydiyyat 21 iyun – 8 iyul tarixləri arasında aparılacaq və imtahan 20 iyulda baş tutacaq.
Azərbaycan Respublikası Nazirlər Kabinetinin 2019-cu il 22 may tarixli 237 nömrəli Qərarı ilə təsdiq edilmiş “Peşəkar mühasib sertifikatının verilməsi prosesinin təşkili, imtahanların keçirilməsi və peşəkar mühasib sertifikatı almış şəxslərin dövlət reyestrinin aparılması Qaydaları”nda dəyişiklik edilməsi haqqında
Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, Azərbaycan Respublikasının Nazirlər Kabineti qərara alır:
Azərbaycan Respublikası Nazirlər Kabinetinin 2019-cu il 22 may tarixli 237 nömrəli Qərarı (Azərbaycan Respublikasının Qanunvericilik Toplusu, 2019, № 5, maddə 970 (Cild I); 2024, № 2, maddə 241, № 3, maddə 341, № 5 (II kitab), maddə 611; 2025, № 1, maddə 83, № 2, maddə 206) ilə təsdiq edilmiş “Peşəkar mühasib sertifikatının verilməsi prosesinin təşkili, imtahanların keçirilməsi və peşəkar mühasib sertifikatı almış şəxslərin dövlət reyestrinin aparılması Qaydaları”nda aşağıdakı dəyişikliklər edilsin:
1. 2.2-ci bəndə “(bundan sonra – tapşırıqlar toplusu)” sözlərindən sonra “təşkil edən sualları əhatə edən mövzuları (proqramları), tapşırıqlar toplusunu” sözləri və aşağıdakı məzmunda ikinci cümlə əlavə edilsin:
“Tapşırıqlar toplusu Maliyyə Nazirliyinin nümayəndələrinə (mütəxəssislərinə) yalnız Mərkəzin inzibati binasında qapalı rejimdə təqdim edilir.”.
2. 2.3.8-ci yarımbənddə “10” rəqəmləri “ən azı 5 (beş)” sözləri ilə, “hər bir namizədi məlumatlandırır” sözləri “namizədlərin buraxılış vərəqəsini və imtahanın qaydaları barədə məlumatları əks etdirən yaddaş kitabçasını rəsmi internet saytında yerləşdirir” sözləri ilə əvəz edilsin.
3. 2.3.9-cu yarımbənddən “və imtahanda iştirak edəcək namizədlərin siyahısını” sözləri çıxarılsın.
4. 2.4-cü bənddə “Nazirliyinin tövsiyə etdiyi” sözləri “Nazirliyi ilə razılaşdırılmış” sözləri ilə əvəz edilsin.
5. 2.8.4-cü yarımbəndə “sertifikatına” sözündən sonra “(ACA/ICAEW – Chartered Accountant Qualification)” sözləri əlavə edilsin.
6. 2.8.5-ci yarımbənddə “Serifikatlı” sözü “Sertifikatlı” sözü ilə əvəz edilsin.
7. 2.9-cu bənddə “CİPFA” akronimi “CIPFA” akronimi ilə əvəz edilsin.
8. 2.10–2.12-ci bəndlər aşağıdakı redaksiyada verilsin:
“2.10. Peşəkar mühasib sertifikatı almaq məqsədilə imtahanın keçirilməsi haqqında elan Mərkəzin rəsmi internet saytında yerləşdirilir. Namizəd imtahanın keçirilməsi haqqında elan verildiyi gündən 30 (otuz) gün müddətində imtahanda iştirak etmək üçün fərdi identifikasiya nömrəsini (Azərbaycan Respublikasının vətəndaşları üçün şəxsiyyət vəsiqəsinin FİN kodu, əcnəbilər və vətəndaşlığı olmayan şəxslər üçün Azərbaycan Respublikasının Dövlət Miqrasiya Xidməti tərəfindən verilmiş müvəqqəti və ya daimi yaşamaq üçün icazə vəsiqələrinin FİN kodu, qaçqın statusu almış əcnəbilər və vətəndaşlığı olmayan şəxslərin qaçqın vəsiqəsinin FİN kodu) göstərməklə, Mərkəzin rəsmi internet saytında yaratdığı “Şəxsi kabinet”i vasitəsilə aşağıda qeyd edilən sənədlər və ya məlumatlar əsasında Mərkəzə elektron qaydada müraciət edir:
2.10.1. iqtisadi sahədə orta ixtisas təhsili haqqında sənədin (diplomun) və mühasibatlıq sahəsində azı 5 (beş) illik iş stajına malik olmasını təsdiq edən sənədin surətləri və yaxud ali təhsil haqqında sənədin (diplomun) surəti;
2.10.2. bu Qaydaların 2.8-ci və 2.9-cu bəndlərində göstərilən sertifikatların surəti (olduğu halda) və həmin sertifikatların həqiqiliyi haqqında Maliyyə Nazirliyi tərəfindən akkreditasiya olunmuş peşəkar mühasib təşkilatı tərəfindən təqdim edilmiş təsdiqedici sənəd.
2.10-1. Mərkəz tərəfindən bu Qaydaların 2.10-cu bəndində qeyd olunan sənədlərin və ya məlumatların Elektron Hökumət İnformasiya Sistemi vasitəsilə müvafiq dövlət orqanlarından (qurumlarından) əldə edilməsi mümkün olduqda, həmin sənədlər və ya məlumatlar namizəddən tələb edilmir. Belə sənədlərin və ya məlumatların Elektron Hökumət İnformasiya Sistemi vasitəsilə əldə edilməsi mümkün olmadığı hallarda onların təqdim edilməsi namizədin razılığı ilə sorğu əsasında müvafiq dövlət orqanından (qurumundan) tələb olunur və ya namizəd tərəfindən təmin edilir. 2.11. Namizəd müraciətində bu Qaydaların 2.10-cu bəndində göstərilmiş sənədlərinin və ya məlumatlarının tamlığını və aktuallığını təsdiq edir.
2.12. İmtahanda iştirak etmək üçün namizədin müraciəti, sənədlərinin və ya məlumatlarının tamlığı və aktuallığı Mərkəz tərəfindən yoxlanılır və təsdiq edildikdən sonra namizəd imtahanda iştirak etmək üçün qeydə alınır. İmtahanda iştirak etmək hüququ olmadıqda, sənədlərində və ya məlumatlarında çatışmazlıq (bu Qaydaların 2.10-1-ci bəndinin tələbi nəzərə alınmaqla) olduğu halda namizədə elektron bildiriş göndərilir. Namizədə çatışmazlıqları aradan qaldırmaq üçün 3 (üç) iş günü müddət verilir. Namizədin qeydə alınmamasına səbəb olan çatışmazlıqlar aradan qaldırıldıqdan sonra namizəd imtahanda iştirak etmək üçün qeydə alınır. Çatışmazlıqlar 3 (üç) iş günü müddətində aradan qaldırılmadıqda, namizəd imtahanda iştirak etmək üçün qeydə alınmır.”.
9. 2.13.2-ci yarımbənddən “kalkulyator,” sözü çıxarılsın və həmin yarımbəndə “yardımçı vasitələr” sözlərindən sonra “(kalkulyator istisna olmaqla)” sözləri əlavə edilsin.
10. 2.18-ci bənddən “bütün açıq tipli test tapşırıqları və qapalı tipli test tapşırıqlarının 15-i vergi qanunvericiliyi üzrə, digər” və “isə” sözləri çıxarılsın.
11. 2.18.1-ci yarımbəndə “halda,” sözündən sonra “15 (on beş) qapalı tipli test tapşırığı və 5 (beş) açıq tipli test tapşırığı vergi qanunvericiliyi,” sözləri əlavə edilsin.
12. 2.18.2-ci yarımbəndə “halda” sözündən sonra “15 (on beş) qapalı tipli test tapşırığı və 5 (beş) açıq tipli test tapşırığı vergi qanunvericiliyi,” sözləri əlavə edilsin.
13. 2.21.1-ci və 2.21.2-ci yarımbəndlərdə “35-dən 50-dək” sözləri “35–49” rəqəmləri ilə əvəz edilsin.
14. Aşağıdakı məzmunda 2.21-1-ci və 2.21-2-ci bəndlər əlavə edilsin:
“2.21-1. Namizədin imtahanın istənilən bir mərhələsində topladığı bal bu Qaydaların 3.2-ci bəndində göstərilən sertifikat növlərindən birinin verilməsi üçün yalnız bir dəfə istifadə olunur.
2.21-2. Namizədin imtahanın bir mərhələsində topladığı bal 5 (beş) il qüvvədədir.”
15. 2.23-cü bənddən “ona” sözü çıxarılsın və həmin bənddə “Mərkəzə” sözü “Mərkəz tərəfindən yaradılmış apellyasiya komissiyasına” sözləri ilə əvəz edilsin.
16. 2.24-cü bənddə “mütəxəssislərlə birlikdə namizədin iştirakı ilə baxılır və ona” sözləri “mütəxəssislər tərəfindən baxılır və namizədə” sözləri ilə əvəz edilsin.
17. 2.25-ci bəndin ikinci cümləsi aşağıdakı redaksiyada verilsin: “Sertifikatın əldə edilməsi üçün imtahanın hər bir mərhələsi üzrə ödəniş məbləği bu Qaydaların 3.2.1-ci və 3.2.2-ci yarımbəndlərində göstərilmiş sertifikatlar üçün 100 (yüz) manat, 3.2.3-cü və 3.2.4-cü yarımbəndlərində göstərilmiş sertifikatlar üçün isə 50 (əlli) manat müəyyən edilir.”.
18. Aşağıdakı məzmunda 3.6-1-ci bənd əlavə edilsin:
“3.6-1. İmtahanın ikinci mərhələsinin nəticəsinə əsasən şəxsin bu Qaydaların 3.2.1-ci və 3.2.2-ci yarımbəndlərində göstərilən sertifikatları əldə etmək hüququ yarandıqda, ona bu Qaydaların 3.2.2-ci yarımbəndində göstərilən sertifikat verilir.”.
