Hüquqi şəxs vergi ödəyicisi kimi uçotda olmayan fiziki şəxslərdən daşınmaz əmlakı icarəyə götürərək, həmin əmlakı vergi ödəyicisi kimi uçotda olmayan digər fiziki şəxslərə icarəyə verdiyi halda, mənfəət vergisi və ya ödəmə mənbəyində tutulan vergi üzrə hansı öhdəlikləri yaranır?
Vergi Məcəlləsinin 124.1-ci maddəsinə əsasən, daşınan və daşınmaz əmlak üçün icarə haqqından, həmçinin rezidentin və ya qeyri-rezidentin Azərbaycan Respublikasındakı daimi nümayəndəliyinin ödədiyi və ya onun adından ödənilən royaltidən gəlir Məcəllənin 13.2.16-cı maddəsinə uyğun olaraq Azərbaycan mənbəyindən əldə edilmişdirsə, ödəmə mənbəyində 14 faiz dərəcə ilə vergi tutulur. Vergi Məcəlləsinin 124.3-cü maddəsinə əsasən, rezident müəssisələrə və ya qeyri-rezidentlərin daimi nümayəndəliklərinə Azərbaycan Respublikasında ödənilmiş məbləğlər 124-cü maddə üzrə vergitutma obyetki deyildir.
Qeyd olunanlara əsasən:
Hüquqi şəxs tərəfindən vergi ödəyicisi kimi uçotda olmayan fiziki şəxslərdən (və ya VÖEN-i olan fiziki şəxslər) icarəyə götürülmüş əmlaka görə onlara ödənilən icarə haqlarından ödəmə mənbəyində 14 faiz dərəcə ilə vergi hesablanaraq dövlət büdcəsinə ödənilir. Vergi ödəyicisi kimi uçotda olmayan fiziki şəxslər (və ya VÖEN-i olan fiziki şəxslər) tərəfindən icarə haqqı hüquqi şəxsə ödənilərkən ödəmə mənbəyində vergi tutulmur və ödənilən icarə haqqı hüquqi şəxsin ümumi gəlirlərinə aid edilməklə mənfəət vergisinə cəlb edilir və hesabat ilindən sonrakı ilin mart ayının 31-dən gec olmayaraq vergi orqanlarına bəyannamə verilir.
Mənbə: vergiler.az
