Dövlət Vergi Xidməti yeni sistemi hazırlayır – ƏDV bəyannamələri avtomatik doldurulacaq, sahibkarların işi xeyli asanlaşacaq. Orxan Nəzərli: Biznes bəyannamə yox, pul qazanmaqla məşğul olmalıdır. Dövlət Vergi Xidməti: Şikayətlərin 60 faizi sahibkarların xeyrinə həll olunur
Dövlət Vergi Xidməti ƏDV ödəyiciləri üçün də bəyannamələrin əvvəlcədən doldurulması (pre-filling) mexanizminin tətbiqini nəzərdən keçirir. Məqsəd sahibkarların vergi öhdəliklərinin icrasını sadələşdirməkdir.
Marja.az xəbər verir ki, bunu “Real TV” və “Azərtac”a müsahibəsində Dövlət Vergi Xidmətinin rəisi Orxan Nəzərli müsahibəsində bildirib.
İldə 3 milyona yaxın bəyannamə təqdim olunur.
Orxan Nəzərlinin sözlərinə görə, Azərbaycanda il ərzində təxminən 3 milyona yaxın vergi bəyannaməsi təqdim edilir.
O bildirib ki, Dövlət Vergi Xidmətinin əsas məqsədlərindən biri sahibkarların vergi öhdəliklərinin yerinə yetirilməsinə sərf etdiyi vaxtı minimuma endirməkdir.
“Biz istəyirik ki, biznes bəyannamə doldurmaqla deyil, gəlir əldə etmək və biznesini inkişaf etdirməklə məşğul olsun”, – deyə o qeyd edib.
Sadələşdirilmiş bəyannamələr artıq avtomatik doldurulur.
Dövlət Vergi Xidmətinin rəisi bildirib ki, 2025-ci ilin IV rübündən etibarən sadələşdirilmiş vergi ödəyiciləri üçün pre-filling mexanizmi tətbiq edilir. Bu sistem çərçivəsində vergi orqanında mövcud məlumatlar əsasında bəyannamə əvvəlcədən doldurulur və vergi ödəyicisi yalnız məlumatları yoxlayaraq təsdiqləyir.
Onun sözlərinə görə, növbəti mərhələdə bu mexanizmin daha da təkmilləşdirilməsi və ƏDV ödəyicilərinə də şamil olunması planlaşdırılır.
Kameral yoxlamalar cərimə mexanizmi deyil.
Dövlət Vergi Xidmətinin rəisi bildirib ki, sahibkarların tez-tez narahatlıq ifadə etdiyi kameral vergi yoxlamalarının məqsədi cərimə tətbiq etmək deyil.
Onun sözlərinə görə, kameral nəzarət zamanı vergi ödəyicisinə yalnız aşkar edilmiş uyğunsuzluqlar barədə bildiriş göndərilir və həmin məsələlərin izah edilməsi və ya bəyannamənin dəqiqləşdirilməsi xahiş olunur.
“Biz kameral nəzarətə daha çox erkən xəbərdarlıq və preventiv nəzarət mexanizmi kimi yanaşırıq”, – deyə Orxan Nəzərli bildirib.
Martdan yeni qayda tətbiq olunur.
Orxan Nəzərli bildirib ki, sahibkarların təqdim etdiyi izahatların nəzərə alınmaması ilə bağlı narahatlıqları aradan qaldırmaq üçün texniki dəyişiklik edilib.
Onun sözlərinə görə, bu ilin mart ayından etibarən kameral bildirişlərə verilən izahatlara vergi əməkdaşı münasibət bildirmədən vergi hesablanması texniki olaraq mümkün deyil.
Şikayətlərin 60 faizi müsbət həll olunur.
Dövlət Vergi Xidmətinin rəisi qeyd edib ki, sahibkarların inzibati şikayət, Ombudsman Aparatı və İqtisadiyyat Nazirliyinin Apellyasiya Şurasına müraciət imkanları mövcuddur.
Onun sözlərinə görə, ən çox istifadə olunan mexanizm inzibati şikayətlərdir və həmin müraciətlərin təxminən 60 faizi müsbət həllini tapır.
Orxan Nəzərli bildirib ki, bu şikayətlərin təhlili nəticəsində vergi inzibatçılığında və qanunvericilikdə yeni dəyişikliklər hazırlanır və bu da Vergi Məcəlləsinə mütəmadi dəyişikliklərin edilməsinin əsas səbəblərindən biridir.
Orxan Nəzərli qeyd edib ki, Dövlət Vergi Xidməti dövlət–özəl sektor dialoqunu vergi inzibatçılığının təkmilləşdirilməsinin əsas istiqamətlərindən biri hesab edir. Bu məqsədlə biznes assosiasiyaları, sahibkar birlikləri, yerli və xarici ticarət palataları, eləcə də sahə üzrə ekspertlərlə mütəmadi görüşlər keçirilir.
Orxan Nəzərli qeyd edib ki, ABŞ Ticarət Palatası, Almaniya–Azərbaycan Xarici Ticarət Palatası, Sahibkarlar Konfederasiyası və digər biznes icmaları ilə aparılan müzakirələr nəticəsində sahibkarların gözləntiləri öyrənilir və qanunvericilikdə, eləcə də vergi inzibatçılığında dəyişikliklər hazırlanır.
“Artıq biznes qəbul edilən qərarların obyekti deyil, onların formalaşdırılmasında iştirak edən tərəfdaşdır”, – deyə o vurğulayıb.
Mənbə: marja.az
