Blog Full

Ali təhsil müəssisələrinin bakalavr və magistratura pillələrində təhsil alan tələbələr arasında “Vergilər” mövzusunda olimpiadanın təşkili və keçirilməsi

Q A Y D A L A R I 

1. Ümumi müddəalar

1.1. “Ali təhsil müəssisələrinin bakalavr və magistratura pillələrində təhsil alan tələbələr arasında “Vergilər” mövzusunda olimpiadanın təşkili və keçirilməsi Qaydaları” (bundan sonra – Qaydalar) Azərbaycan Respublikası Prezidentinin 2001-ci il 29 mart tarixli 454 nömrəli Fərmanı ilə təsdiq edilmiş “Azərbaycan Respublikasının Vergilər Nazirliyi haqqında Əsasnamə”yə və digər aidiyyəti hüquqi aktların, eləcə də Vergilər Nazirliyinin normativ sənədlərinin tələblərinə uyğun olaraq hazırlanmışdır.

1.2. Ali təhsil müəssisələrinin bakalavr və magistratura pillələrində təhsil alan tələbələr arasında “Vergilər” mövzusunda olimpiadanın (bundan sonra – olimpiada) keçirilməsində əsas məqsəd ali təhsil müəssisələrinin bakalavr və magistratura pillələrində  təhsil alan tələbələr (bundan sonra – tələbələr) arasında vergitutma sahəsində biliklərin artırılması, onların vergi sahəsində bilik səviyyəsinin qiymətləndirilməsi, vergi mədəniyyətinin artırılması, eləcə də gələcəkdə nümunəvi vergi ödəyicilərinin və ya vergi sahəsində çalışacaq peşəkar mütəxəssislərin yetişdirilməsi üçün zəmin yaradılmasından ibarətdir.

1.3. Bu Qaydalar tələbələr arasında olimpiadanın təşkilini, keçirilməsini, nəticələrinin rəsmiləşdirilməsini və bununla bağlı digər məsələləri müəyyən edir.

1.4. Olimpiadada ali təhsil müəssislərinin iqtisadiyyat və idarəetmə, hüquq və beynəlxalq münasibətlər istiqamətləri üzrə təhsil alan tələbələri iştirak edə bilərlər.

1.5. Olimpiadanın keçirilməsi və nəticələri barədə məlumatlar kütləvi informasiya vasitələrində yayımlanır.

2. Olimpiadanın təşkili

2.1. Vergilər Nazirliyinin Vergi ödəyicilərinə xidmət və şəffaf vergi partnyorluğu departamenti (bundan sonra – Departament) olimpiadanın keçirilməsinə məsul strukturdur.

2.2. Olimpiadanın təşkili və keçirilməsi üzrə Departament aşağıdakıları həyata keçirir:

2.2.1. olimpiadanın şəffaf, obyektiv və yüksək səviyyədə keçirilməsi üçün hazırlıq işlərinin aparılmasını və vaxtında başa çatdırılmasını təmin etmək;

2.2.2. hər il üzrə keçirilməsi nəzərdə tutulan olimpiadanın təşkilinə dair proqramı Vergilər Nazirliyinin Tədris Mərkəzi ilə razılaşdırmaqla hazırlamaq;

2.2.3. olimpiadada iştirak edəcək ali təhsil müəssisələrini və yekun mərhələdə iştirak edəcək tələbə sayını  müəyyənləşdirmək;

2.2.4. ali  təhsil müəssisələri ilə koordinasiyanı təmin etmək;

2.2.5. olimpiadanın yerini və vaxtını müəyyənləşdirmək və bu barədə ali təhsil müəssisələrinə məlumat vermək;

2.2.6. olimpiadanın keçirilməsi müddətində və nəticələrinin yoxlanılmasında iştirak etmək istəyən ali təhsil müəssisələrinin nümayəndələri üçün lazımi şərait yaratmaq;

2.2.7. olimpiadanın son nəticələrini ümumiləşdirərək təhlil etmək və Vergilər Nazirliyinin rəhbərliyinə təqdim edilməsi üçün yekun hesabatı hazırlamaq;

2.2.8. olimpiadanın bu Qaydalara uyğun həyata keçirilməsi üçün digər zəruri tədbirləri yerinə yetirmək.

2.3. Vergilər Nazirliyinin Tədris Mərkəzi olimpiadanın iştirakçıları üçün sual bazasının hazırlanmasını təmin edir, olimpiadanın seçmə mərhələsinin keçirilməsində və namizədlərin seçilməsi prosesində ali təhsil müəssisələrinə lazımi metodiki köməklik göstərir.

2.4. Olimpiadanın keçirilməsi zamanı sual bazasının ekspertizası və nəticələrin qiymətləndirilməsi münsiflər heyəti tərəfindən həyata keçirilir.

2.5. Münsiflər heyətinin tərkibi Vergilər Nazirliyi tərəfindən ali təhsil müəssisələri və Vergilər Nazirliyinin Tədris Mərkəzinin təmsilçilərinin də iştirak etdiyi minimum 3 nəfərdən ibarət olmaqla müəyyən edilir.

3. Olimpiadanın keçirilməsi

3.1. Olimpiada bir qayda olaraq hər il ümummilli lider Heydər Əliyevin doğum günü ərəfəsində keçirilir və may ayının 10-dək başa çatdırılır.

3.2. Olimpiadanın keçirilmə mərhələləri, başlanma və başa çatma tarixləri bu Qaydaların 2.2.2-ci yarımbəndində göstərilən proqrama uyğun həyata keçirilir.

3.3. Olimpiada seçmə mərhələ və yekun mərhələ olmaqla iki mərhələdə keçirilir.

3.4. Seçmə mərhələsi olimpiadada iştirakı nəzərdə tutulan hər bir ali təhsil müəssisəsinin özündə keçirilir. Ali təhsil müəssisələri öz tələbələri arasında nəzərdə tutulan mövzular əsasında Vergilər Nazirliyinin Tədris Mərkəzi tərəfindən hazırlanmış 50 test sualı üzrə 90 dəqiqəlik daxili imtahan keçirirlər.  İmtahanların nəticələri barədə məlumat Vergilər Nazirliyinə təqdim edilir.

3.5. Yekun mərhələ seçmə mərhələdən keçmiş namizədlər arasında bu Qaydalara uyğun olaraq Departament tərəfindən təşkil edilir. Departament münsiflər heyəti ilə razılaşdırmaqla yekun mərhələdə iştirak edəcək namizədlərin sayını və nəticələri daha yüksək olan tələbələrdən ibarət olmaqla tərkibini müəyyən edir. Departament tərəfindən yekun mərhələnin keçirilməsi vaxtı barədə məlumat imtahana ən azı 15 gün qalmış ali təhsil müəssisələrinə bildirilir.

3.6. Olimpiadanın yekun mərhələsi test imtahanı formasında Vergilər Nazirliyinin Tədris Mərkəzində keçirilir. İştirakçılar tərəfindən qeyd olunan binaya daxil olmaq üçün şəxsiyyət vəsiqəsi və tələbə bileti təqdim edilməlidir.

3.7. Vergilər Nazirliyinin Tədris Mərkəzi tərəfindən bakalavrlar üçün vergi qanunvericiliyi  fənni üzrə 50, magistrlər üçün isə vergi qanunveriliyi fənni üzrə 50, vergi inzibatçılığı fənni üzrə 25 sual olmaqla ümumilikdə 75 sualdan ibarət olan fərdi test bazası hazırlanır.

3.8. İmtahan onlayn rejimdə bakalavrlar üçün 120, magistrlər üçün isə 150 dəqiqə ərzində keçirilir. Hər düzgüb cavab bir balla qiymətləndirilir. Səhv cavablara görə düzgün cavablar silinmir. Nəticələr münsiflər heyətinin iştirakı və nəzarəti altında xüsusi kompyuter proqramları vasitəsilə qiymətləndirilir.

3.9. Olimpiadanın gedişi zamanı iştirakçılar tərəfindən normativ-hüquqi sənədlərdən, təlimatlardan, metodiki göstərişlərdən, elektron məlumat daşıyıcılarından və digər köməkçi vasitələrdən istifadə edilməsinə yol verilmir. Bu cür hallar aşkar edildikdə iştirakçı imtahandan xaric edilir, onun nəticəsi nəzərə alınmır və bu barədə həmin ali təhsilin müəssisəsinin nümayəndəsinə məlumat verilir.

3.10. Olimpiada başa çatdıqdan sonra nəticələr gün ərzində elan olunur. Olimpiadanın qalibləri ali təhsil müəssisəsinin bakalavr və magistratura pillələrində təhsil alan tələbələr üzrə ayrı-ayrılıqda müəyyən edilir.

3.11. Eyni nəticə əldə etmiş iştirakçılardan üstünlük çətinlik dərəcəsi yüksək olan sualları cavablandırmış iştirakçıya verilir.

3.12. Təqdim olunmuş suallar üzrə ən çox bal toplayan iştirakçılar 1-ci, 2-ci və 3-cü yerlər olmaqla Olimpiadanın qalibləri elan edilir və onlara sertifikatlar təqdim edilir.

Bildiririk ki, Azərbaycan Respublikasının Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu tərəfindən 2017-ci ilin 01 aprel tarixindən etibarən “Sığorta iştirakçılarının qeydiyyatı”, “Daxil olan ödənişlərin uçotu və Fərdi uçot əsaslı Vahid Rüblük Hesabat Alt sistemi” adlı xüsusi proqram təminatları elektron hökumət portalında (www.e-gov.az) yerləşdirilmişdir. Nəzərinizə çatdırırıq ki, “Məcburi Dövlət sosial sığorta haqqının toplanması Qaydaları”na edilmiş dəyişikliklərə əsasən əvvəlki hesabat dövrlərində ayrı-ayrılıqda təqdim edilən hesablanmış və ödənilmiş məcburi dövlət sosial sığorta haqqı və digər daxil olan məbləğlər barədə rüblük hesabat (Forma B1) və məcburi dövlət sosial sığorta haqqı üzrə sığortaolunanlar haqqında illik məlumat (Forma B3) birləşdirilərək 2017-ci ilin 1-ci rübündən etibarən hər rüb bir yerdə sığortaedənlər tərəfindən təqdim edilməlidir.

Müraciətin tam mətnini aşağıdakı faylı yükləməklə oxuya bilərsiniz:

APREL 

Qeyd: Verginin ödənilmə və bəyannamənin (o cümlədən arayışın) verilmə müddətinin sonuncu günü təqvimdə sarı rənglə qeyd edilmişdir. Həmin gün istirahət və ya bayram gününə düşdüyü halda növbəti iş gününə keçirilir.

Ödənilən vergi:

17 aprel – «(1) və (2)».

20 aprel – «(1-1)», «(1-2)», «3», «4», «7», «8», «9», «(9-1)», «10.1», «10.2», «10.3» və «11».

«(1) və (2)» – Gəlir və Mənfəət vergisi: Gəlir və mənfəət vergisi üzrə hesabat dövrü təqvim ilidir. Hüquqi şəxslər və fərdi sahibkarlar rüb qurtardıqdan sonra 15 gündən gec olmayaraq cari ödəmələri dövlət büdcəsinə ödəməlidirlər. Bələdiyyə mülkiyyətində olan müəssisə və təşkilatlar mənfəət vergisini yerli büdcəyə (bələdiyyə büdcəsinə) ödəyirlər. Cari vergi ödəmələri vergi ili üçün vergi ödəyicisindən tutulan verginin məbləğinə aid edilir.

Vergi ödəyicisi il ərzində cari vergi ödəmələrinin məbləğini öz seçiminə əsasən aşağıda göstərilən iki mümkün metoddan birinə uyğun müəyyənləşdirə bilər.

Birinci metod: Hər rüb üçün cari ödəmələrin məbləği əvvəlki vergi ilində hesablanmış verginin 1/4 hissəsi məbləğində müəyyən edilir.

İkinci metod: Cari rübdəki gəlirin məbləğini keçən ilin ümumi gəlirində (gəlirdən çıxılan məbləğlər nəzərə alınmadan) verginin xüsusi çəkisini göstərən əmsala vurmaqla müəyyən edilir.

Bu zaman vergi ödəyicisi il ərzində cari vergi ödəmələrinin məbləğini müəyyənləşdirməyin yuxarıdakı iki mümkün metodundan birini seçir və hər il aprel ayının 15-dən gec olmayaraq bu barədə vergi orqanına məlumat verir. Vergi ödəyicisi cari vergi ödəmələrinin məbləğini müəyyənləşdirmək üçün tətbiq etdiyi metod barədə məlumat vermədiyi halda vergi orqanı birinci metodu tətbiq edir.

Vergi ödəyicisi cari vergi ödəmələrinin məbləğini müəyyənləşdirmək üçün ikinci metodu seçdiyi halda, hər rüb başa çatdıqdan sonra 15 gün ərzində mənfəətdən və ya gəlirdən hesablanmış cari vergi məbləği barədə vergi orqanına arayış təqdim etməlidir, əks halda, vergi orqanı birinci metodu tətbiq edir.

Əvvəlki vergi ilində fəaliyyəti olmayan və növbəti vergi ilndə fəaliyyət göstərən, habelə yeni yaradılmış və fəaliyyət göstərən vergi ödəyiciləri mənfəət və ya gəlir vergisi üzrə cari vergi ödəməlrini təqvim ili ərzində rüblər üzrə artan yekunla hesablamalı, cari vergi ödəmələrinin məbləği mənfəətdən və ya gəlirdən verginin məbləğinin 75 faizindən az olmamalı, rüb başa çatdıqdan sonra 15 gün ərzində cari vergi ödəmələrini aparmalı və rüb ərzində mənfəətdən və ya gəlirdən hesablanmış cari vergi məbləği barədə vergi orqanına arayış təqdim etməlidir.

«(1-1)» – Gəlir vergisi (xüsusi notariuslar üzrə): Xüsusi notariusların gəlir vergisi üzrə hesabat dövrü rübüdür.

Xüsusi notariuslar tərəfindən hər bir ay ərzində aparılan notariat hərəkətlərinə, habelə notariat hərəkətləri ilə əlaqədar göstərilən xidmətlərə görə alınan haqlardan (xərclər nəzərə alınmadan) 10 faiz dərəcə ilə gəlir vergisi hesablamalı, hesablanmış vergi məbləği isə növbəti ayın 20-dən gec olmayaraq dövlət büdcəsinə ödəməlidir.

Xüsusi notariuslar tərəfindən aparılan notariat hərəkətlərinə, habelə notariat hərəkətləri ilə əlaqədar göstərilən xidmətlərə görə alınan haqlardan (xərclər nəzərə alınmadan) hesablanan gəlir vergisi barədə “Xüsusi notariusun gəlir vergisi bəyannaməsi” hər rüb başa çatdıqdan sonra növbəti ayın 20-dən gec olmayaraq vergi orqanına təqdim edilməlidir.

(«1-2») – Gəlir vergisi (İdman mərc oyunları üzrə) İdman mərc oyunlarından uduşlar əldə edən şəxsdən ödəmə mənbəyində tutulan gəlir vergisi üzrə hesabat dövrü aydır.

İdman mərc oyunlarından uduşlar əldə edən şəxsə ödəmələr verən şəxslər ödəmə mənbəyində vergini tutmağa, hesabat ayından sonrakı ayın 20-dən gec olmayaraq hesablanmış vergini dövlət büdcəsinə köçürməyə və “İdman mərc oyunlarından uduşlar əldə edən şəxsdən ödəmə mənbəyində tutulan gəlir vergisinin bəyannaməsi”ni vergi orqanına verməyə borcludurlar.

«3» – Əlavə dəyər vergisi: ƏDV üzrə hesabat dövrü təqvim ayı sayılır. ƏDV ödəyən vergi ödəyicisi ƏDV-nin bəyannaməsini hər hesabat dövrü üçün, hesabat dövründən sonrakı ayın 20-dən gec olmayaraq qeydiyyatda olduğu vergi orqanına verir və vergini dövlət büdcəsinə ödəyir.

«4» – Aksizlər: Aksizlər üzrə hesabat dövrü təqvim ayıdır. Aksizli mallar istehsal edildikdə hər hesabat dövrü üçün vergi tutulan əməliyyatlar üzrə aksizlər hesabat dövründən sonrakı ayın 20-dən gec olmayaraq dövlət büdcəsinə ödənilməli və vergi orqanına bəyannamə verilməlidir.

«7» – Yol vergisi üçün hesabat dövrü təqvim ayı sayılır. Azərbaycan Respublikasının ərazisində avtomobil benzininin, dizel yanacağının və maye qazın istehsalı ilə məşğul olan fiziki və hüquqi şəxslər yol vergisini aylıq olaraq hesablayır və hesabat ayından sonrakı ayın 20-dən gec olmayaraq “Yol vergisinin bəyannaməsi”ni vergi orqanına təqdim etməklə vergini dövlət büdcəsinə ödəyirlər.

«8» – Mədən vergisi: Mədən vergisi üzrə hesabat dövrü təqvim ayı sayılır. Mədən vergisinin ödəyicisi hesabat ayı üçün faydalı qazıntıların çıxarıldığı aydan sonrakı ayın 20-dən gec olmayaraq vergini ödəyir və bəyannamə verirlər. Yerli əhəmiyyətli tikinti materialları üzrə mədən vergisi yerli (bələdiyyə) büdcəyə ödənilir və bələdiyyələrə mədən vergisinin bəyannaməsi verilir. Yerli əhəmiyyətli tikinti materiallarına kərpic-kirəmit gilləri, tikinti qumları, çınqıl xammalı aid edilir.

«9» – Sadələşdirilmiş vergi: Sadələşdirilmiş vergi üzrə hesabat dövrü rübdür. Sadələşdirilmiş verginin ödəyicisi olan şəxs hesabat rübündən sonrakı ayın 20-dən gec olmayaraq ödənməli olan verginin məbləği haqqında vergi orqanına bəyannamə verir və həmin müddətdə vergini dövlət büdcəsinə ödəyir.

(«9-1») – Sadələşdirilmiş vergi (Yaşayış və qeyri-yaşayış sahələrinin təqdim edilməsi üzrə) – Yaşayış və qeyri-yaşayış sahələrinin təqdim edilməsi üzrə müqavilələri təsdiq edən notarius sadələşdirilmiş vergini hesablayaraq 1 (bir) bank günü ərzində dövlət büdcəsinə ödəməyə və hesabat ayından sonrakı ayın 20-dən gec olmayaraq “Yaşayış və qeyri-yaşayış sahələrini təqdim edən şəxslərdən notariuslar tərəfindən ödəmə mənbəyində tutulan sadələşdirilmiş vergi bəyannaməsi”ni vergi orqanına verməyə borcludurlar.

«10.1» – Muzdlu işlə əlaqədar ödəmə mənbəyində tutulan vergi:

Muzdlu işlə əlaqədar ödəmə mənbəyində vergi tutan ƏDV və sadələşdirilmiş vergi ödəyicilərinin bu ödəmələr üzrə hesabat dövrü vergi ili, digər vergi ödəyicilərinin hesabat dövrü isə rübdür.

Muzdla işləyən fiziki şəxslərə ödəmələr verən hüquqi şəxslər və fərdi sahibkarlar muzdla işləyən fiziki şəxslərin hesablanmış aylıq gəlirinə gəlir vergisini hesablamalı və hesablanmış məbləği növbəti ayın 20-dən gec olmayaraq dövlət büdcəsinə ödəməlidirlər.

Muzdlu işlə əlaqədar ödəmə mənbəyində tutulan vergilər barədə bəyannaməni ƏDV və sadələşdirilmiş verginin ödəyiciləri hesabat ilindən sonrakı ilin yanvar ayının 31-dən  gec olmayaraq, digərləri isə hesabat rübü başa çatdıqdan sonra növbəti ayın 20-dən gec olmayaraq vergi orqanına təqdim etməlidirlər.

«10.2» – Ödəmə mənbəyində tutulan digər vergilər:

ƏDV və sadələşdirilmiş verginin ödəyicilərinin muzdlu işlə əlaqədar aparılan ödəmələri istisna olmaqla, ödəmə mənbəyində tutulan digər vergilər üzrə hesabat dövrü rübdür.

Hüquqi şəxslər və fərdi sahibkarlar qeyri-dövlət pensiyaları və ödəmə mənbəyində vergiyə cəlb olunmalı olan digər ödəmələri verərkən bu gəlirlərdən vergini tutmalı, tutulmuş məbləği gəlirin ödənildiyi rübdən sonrakı ayın 20-dən gec olmayaraq dövlət büdcəsinə köçürülməli və həmin müddətdə də bəyannaməni vergi orqanına təqdim etməlidirlər.

«10.3» – Sığorta müqaviləsi vaxtından əvvəl xitam verildikdə ödəmə mənbəyində tutulan vergi:

Həyatın yığım sığortası və pensiya sığortası üzrə bağlanılmış sığorta müqaviləsinə vaxtından əvvəl xitam verildikdə aparılan ödəmələrdən ödəmə mənbəyində tutulan verginin hesabat dövrü rübdür.

Həyatın yığım sığortası və pensiya sığortası üzrə bağlanılmış sığorta müqaviləsinə vaxtından əvvəl xitam verildikdə, sığorta haqları ödəyən sığortaçılar fiziki şəxslərin hesablanmış aylıq gəlirinə gəlir vergisi hesablamalı və hesablanmış vergini növbəti ayın 20-dən gec olmayaraq dövlət büdcəsinə ödəməli və gəlirin ödənildiyi rübdən sonrakı ayın 20-dən gec olmayaraq bəyannaməni vergi orqanına təqdim etməlidirlər.

«11» – Dövlət rüsumu: Dövlər rüsumu üzrə hesabat dövrü rübdür. Notariat hərəkətlərinə görə dövlət rüsumu notarius tərəfindən qəbul edildilərək iki bank günü ərzində,  Azərbaycan Respublikasının xarici ölkələrdəki diplomatik nümayəndəliklərində aparılan konsul əməliyyatları üçün alınan dövlət rüsumu bir ay ərzində, digər dövlət rüsumları isə tutulduqdan sonra bir bank günü ərzində dövlət büdcəsinə köçürülür.

«Dövlət rüsumu haqqında» Qanunda nəzərdə tutulmuş dövlət rüsumunu tutan şəxslər hesabat rübündən sonrakı ayın 20-dək dövlət rüsumunun tutulması barədə hesabatları vergi orqanına təqdim etməlidirlər.

Mənbə: taxes.gov.az

Məlumat üçün bildiririk ki, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının təşkilatçılığı , Azərbaycan Respublikası Vergilər Nazirliyinin dəstəyi ilə 08 Aprel 2017-ci il tarixində Şamaxı rayonu Pirqulu qəsəbəsindəki Vergilər Nazirliyinin Tədris Mərkəzində “Milli Mühasiblər Forumu” keçiriləcəkdir.

Forumda iştirak etmək istəyən şirkətlərdən qeydiyyat forumunu doldurub bizə yollamağınız xahiş olunur. Forumda iştirak məhdud sayda olacaq  bunun üçün iştirakınızı qısa zamanda təsdiq etməyiniz xahiş olunur.

QEYD : Sponsorluq üçün son tarix : 17.03.2017

İştirak üçün son tarix : 31.03.2017

Əlaqələndirici şəxs : Rauf Əliyev

Əlaqə tel : 070 290 99 11

E-mail : raliyev@ask.org.az